نواز شریف کی جیل سے اے سی اتارنے پر شہباز شریف کا چیف سیکریٹری کو خط

مسلم لیگ ن کے صدر شہباز شریف نے سابق وزیراعظم نواز شریف کی جیل سے اے سی اتارنے کے حکومت پنجاب کے فیصلے کو میڈیکل بورڈ کی سفارشات کی خلاف ورزی قرار دیدیا۔

وزیراعظم عمران خان نے دورہ امریکا میں پاکستانی کمیونٹی سے خطاب میں کہا تھا کہ پاکستان واپس جا کر جیلوں سے اے سی اور ٹی وی نکلواؤں گا۔

عمران خان کا کہنا تھاکہ جیلوں سے اے سی اور ٹی وی نکلوانے کے فیصلے پر مریم بی بی بہت شور مچائیں گی مگر جس طرح یہ لوگ جیلوں میں رہ رہے ہیں یہ سزا تو نہ ہوئی کہ آپ اے سی میں رہ رہے ہوں اور آپ کو ٹی وی اور اخبار کی سہولت بھی حاصل ہو۔

پاکستان واپس جاکر جیلوں سے اے سی اور ٹی وی نکلوا دوں گا : وزیراعظم

مریم بی بی شور تو مچائیں گی مگر یہ جس طرح جیلوں میں رہ رہے ہیں یہ سزا نہیں، گھرجانا ہے تو پیسہ واپس کرنا ہوگا، امریکا میں خطاب

وزیراعظم عمران خان کے بیان پر مسلم لیگ ن نے شدید تنقید کی تھی جب کہ سابق صدر آصف زرداری نے کہا تھا کہ وزیراعظم کو بتا دو کہ ہم تو بیرکوں میں رہنے کے عادی ہیں۔

وزیراعظم عمران خان کی معاون خصوصی برائے اطلاعات فردوس عاشق اعوان کا اس حوالے سے کہنا ہے کہ جیلوں سے اے سی نکلوانے کا فیصلہ پنجاب حکومت کو کرنا ہے۔

قومی اسمبلی میں قائد حزب اختلاف شہباز شریف نے نواز شریف کی جیل سے اے سی اتارے جانے کے معاملے پر چیف سیکریٹری پنجاب کو خط لکھا۔

شہباز شریف نے سیکریٹری پنجاب کو لکھا کہ پنجاب حکومت نے آئی جی جیل خانہ جات کو خط لکھ کر اے سی اتارنے کی ہدایت کی ہے۔

انہوں نے خط میں لکھا کہ نواز شریف کی جیل سے اے سی اتارنے کا خط میڈیکل بورڈ کی سفارشات کی خلاف ورزی ہے۔

عمران کو بتاؤ ہم بیرکوں میں رہنے کے عادی ہیں: آصف زرداری

چیئرمین سینیٹ نہ میں نے بنایا اور نہ میں اتارنے جارہا ہوں، سابق صدر کی احتساب عدالت میں صحافیوں سے گفتگو

صدر مسلم لیگ ن نے سیکریٹری پنجاب کو لکھا کہ آپ کی توجہ پنجاب حکومت کے تشکیل کردہ بورڈ کی سفارشات کی جانب مبذول کرانا چاہتا ہوں۔

ان کا خط میں کہنا تھا کہ میڈیکل بورڈ کی سفارش ہے کہ نوازشریف کو مناسب درجہ حرارت والے کمرے میں رکھا جائے۔

انہوں نے مزید لکھا کہ میڈیکل رپورٹ میں بتایا گیا کہ مناسب درجہ حرارت میں نہ رکھنے سے نواز شریف کے گردے فیل ہو سکتے ہیں۔

شہباز شریف کا خط میں کہنا ہے کہ محکمہ داخلہ پر حیران ہوں کہ نواز شریف کی صحت سے متعلق کلیدی نکتہ کو کیسے نظر انداز کر دیا، اس اقدام کے نواز شریف کی صحت پر انتہائی مضراثرات ہوں گے۔

شہباز شریف نے لکھا کہ نواز شریف کی جیل سے اے سی اتارنے کا اقدام وزیراعظم کی خواہش کے مطابق کیا گیا ہے۔

شہباز شریف مَن گھڑت خبروں سے عوام کو گمراہ نہ کریں: شہباز گل

ترجمان وزیراعلیٰ پنجاب شہباز گل نے شہباز شریف کی جانب سے سیکریٹری پنجاب کو لکھے گئے پر کہا ہے شہباز شریف غلط بیانی سے کام لے رہے ہیں۔

شہباز گل کا کہنا ہے کہ پنجاب حکومت کی جانب سے آئی جی جیل کو کوئی خط نہیں لکھا گیا، شہباز شریف مَن گھڑت اور خودساختہ خبروں سے عوام کو گمراہ نہ کریں۔

انہوں نے کہا کہ نواز شریف کے معاملے پر کوئی احکامات جاری نہیں کیے گئے، تحریک انصاف کی حکومت قانون کی حکمرانی پر یقین رکھتی ہے۔

ترجمان پنجاب حکومت نے کہا کہ سزا یافتہ قیدیوں کے لیے تمام فیصلے قانون اور جیل مینول کے مطابق کیے جائیں گے۔

شہباز گل نے کہا کہ شہباز شریف سیاسی طور پر زندہ رہنے کے لیے نواز شریف کی صحت کا سہارا لے رہے ہیں۔

انہوں نے کہا کہ کرپٹ لیگ کے لیڈر گمراہ کُن پروپگینڈا کر کے حقائق پر پردہ نہیں ڈال سکتے، چچا بھتیجی کو غلط بیانی کے باعث مسلسل سبکی کا سامنا کرنا پڑ رہا ہے۔

سابق وزیراعظم نواز شریف کے جیل کے کمرے میں ائیر کنڈیشنر کیوں لگا؟

امریکا میں پاکستانی کمیونٹی سے خطاب میں وزیراعظم عمران خان نے کہا کہ وہ پاکستان واپس جاکر جیلوں سے اے سی نکلوادیں گے

'نواز شریف کو جیل میں ٹی وی اور اے سی کے معاملے پر فیصلہ پنجاب حکومت کرے گی'

جیل مینوئل پر عمل ہوگا، عمران خان کا نواز شریف سے کوئی ذاتی عناد نہیں، ان کا بیانیہ ہے کہ سب کیلئے ایک قانون ہونا چاہیے، فردوس عاشق