عیدالاضحیٰ پر منفرد کلیجی ناشتہ

عید الاضحیٰ پر ہر مسلمان اپنی استطاعت کے مطابق سنت ابراہیمیؑ کا فریضہ ادا کرتا ہے جس کے بعد وہ خوش اسلوبی سے گوشت کو غریبوں اور مسکینوں سمیت رشتہ داروں میں تقسیم کرتا ہے اور یوں عید قرباں منائی جاتی ہے۔

قربانی کا فریضہ ادا ہونے کے بعد جہاں مرد حضرات  گوشت بنوانے کی ذمہ داری سنبھال رہے ہوتے ہیں وہیں خواتین کچن میں ناشتے کی تیاری کرتی ہیں اور بڑی عید پر ہر گھر میں ہی کلیجی کے ناشتے کا اہتمام کیا جاتا ہے۔

جانور قربان کر کے سب سے پہلے کلیجی والا حصہ بنا کر خواتین کو دے دیا جاتا ہے تاکہ وہ لذیذ اور ذائقے دار کلیجی جلد تیار کر دیں۔

یوں تو ہر بڑی عید پر روایتی طریقے سے کلیجی پکائی جاتی ہے لیکن کیوں نا اس دفعہ منفرد تراکیب سے کلیجی تیار کی جائے اور دستر خوان کی رونق بڑھائی جائے۔

تو آئیے جانتے ہیں بار بی کیو کلیجی اور ہرے مصالحے کی کلیجی بنانے کی تراکیب۔

باربی کیو کلیجی:

اجزاء:

کلیجی

سرکہ۔۔۔۔۔۔4 سے 5 کھانے کے چمچ

تیل۔۔۔۔۔۔۔۔۔۔1 کپ

ادرک لہسن پیسٹ۔۔۔۔۔۔۔۔۔ڈیرھ کھانے کا چمچ

ہلدی۔۔۔۔۔۔۔۔۔۔1 چائے کا چمچ

گرم مصالحہ پاؤڈر۔۔۔۔۔۔۔۔1 چائےکا چمچ

کٹی لال مرچ۔۔۔۔۔۔۔۔۔۔1 چائے کا چمچ

لال مرچ پاؤڈر۔۔۔۔۔۔۔1 چائے کا چمچ

بھنا کُٹا ہوا زیرہ۔۔۔۔۔۔۔۔1 چائے کا چمچ

تلی ہوئی پیاز۔۔۔۔۔۔۔آدھا کپ

لیمو رس۔۔۔۔۔۔۔ 1 کھانے کا چمچ

دہی ۔۔۔۔۔۔۔1 پاؤ

نمک۔۔۔۔۔۔۔حسب ذائقہ 

ادرک۔۔۔۔۔۔۔۔لمبی کٹی ہوئی 

موٹی مرچیں۔۔۔۔۔۔2 سے 3

ہرا دھنیہ۔۔۔۔۔3 سے 4 لڑی

کوئلہ۔۔۔۔۔۔۔1 چھوٹا ٹکڑا

ترکیب:

سب سے پہلے کلیجی صاف کریں اور اس میں سرکہ لگا کر آدھے گھنٹے کے لیے رکھ دیں۔آدھے گھنٹے کے بعد اسے اُبال لیں اور پھر چھلنی میں چھان کر ایک جگہ رکھ دیں تاکہ پانی نکل جائے۔

پھر 1 کپ تیل میں 1 درمیانی پیاز ڈال کر تلیں، اسے نکال کر ٹرے میں ڈال کے سوکھائیں اور پاؤڈر بنالیں۔پھر پیاز والے بچے تیل میں کلیجی ڈالیں اور ادرک لہسن کا پیسٹ شامل کر کے خوب بھونیں جب کلیجی سے بساند نکل جائے تو اس میں ہلدی، گرم مصالحہ، بھنا کٹا ہوا زیرہ، پسی لال مرچ، کٹی لال مرچ پاؤڈر، لیموں کا رس اور نمک حسب ذائقہ شامل کرکے مکس کریں پھر دہی میں تلی پیاز پاؤڈر ملا کر کلیجی میں ڈال دیں اور اسے درمیانی آنچ پر پکنے دیں جب تک کہ تیل الگ نہ ہوجائے۔

بعد ازاں کوئلے کا ٹکڑا جلا کر ایک روٹی کے حصے میں رکھ کر اسے کلیجی کے اندر رکھ دیں اور  5 سے 7 منٹ تک باریک آنچ  پر ڈھکن ڈھک دیں۔ اسموک ہوجائے تو کلیجی کو ڈش میں نکالیں اور اس پر ادرک، دھنیا سمیت مرچیں گارنش کرکے دسترخوان پر پیش کریں۔  

ہرا مصالحہ کلیجی:  

اجزاء:

 کلیجی۔۔۔۔۔۔۔۔1 کلو

ادرک لہسن پیسٹ۔۔۔۔۔۔۔2 کھانے کے چمچ

گھی۔۔۔۔۔۔۔۔ حسب ضرورت

ہری مرچ۔۔۔۔۔۔6 سے 8 عدد

کالی مرچ ثابت۔۔۔۔۔10 سے 8 عدد

ہرا دھنیہ۔۔۔۔۔۔1 گٹھی

ہلدی۔۔۔۔۔۔۔1 چائے کا چمچ

زیرہ بھنا پسا ہوا۔۔۔۔۔۔1 چائے کا چمچ

گرم مصالحہ پاؤڈر۔۔۔۔۔۔۔۔آدھا چائے کا چمچ   

نمک۔۔۔۔۔۔۔۔حسب ذائقہ

لیموں۔۔۔۔۔۔۔2 عدد رس نکلا ہوا

ترکیب:

سب سے پہلے کلیجی صاف کریں اور اس میں سرکا لگا کر آدھے گھنٹے کے لیے رکھ دیں۔آدھے گھنٹے کے بعد اسے اُبال لیں اور پھر چھلنی میں چھان کر ایک جگہ رکھ دیں تاکہ پانی نکل جائے۔

ہری مرچیں، کالی مرچیں اور ہرا دھنیہ تھوڑا پانی ڈال کر گرینڈ کر کے ہرا مصالحہ پیسٹ بناکر رکھ لیں۔

پھر سب سے پہلے ایک پین میں گھی، کلیجی اور ادرک لہسن پیسٹ ڈال کر کلیجی کو خوب بھونیں تاکہ بساند نکل جائے۔ پھر اس میں ہرا مصالحہ شامل کریں اور اسے درمیانی آنچ پر بھوندیں پھر اس میں زیرہ، ہلدی، گرم مصالحہ اور نمک حسب ذائقے  ڈالیں جب پانی خشک ہوجائے تو اس میں لیموں کا رس ڈال کر ہلکی آنچ پر پکائیں اور اس کے بعد دسترخوان کی زینت بنائیں۔

نوٹ: ریسیپیز میں آپ اپنے ذائقے اور مقدار کے مطابق مصالحے شامل کر سکتے ہیں۔