22 اگست ، 2019
قومی ٹیم کے سابق کپتان اور فاسٹ بولر وقار یونس نے انگلش فاسٹ بولر جوفرا آرچر کو روایتی طور پر ویسٹ انڈین بولرز کی طرح خطرناک قرار دیدیا۔
وقار یونس نے انگلینڈ کے بولر جوفرا آرچر کو فاسٹ بولنگ کی دنیا میں ایک شاندار اضافہ قرار دیتے ہوئے کہا کہ وہ آسان رن اپ کے ساتھ بولنگ کرتے ہیں، انہوں نے چیزوں کو اپنے لیے مشکل نہیں بنایا ہوا۔
اپنے دور میں مخالف بیٹسمینوں کی نیندیں حرام کرنے والے فاسٹ بالر وقار یونس کا کہنا ہے کہ جوفرا آرچر ورلڈ کپ سے قبل ہی لوگوں کی نظروں میں تھے۔
وقار یونس نے مزید کہا کہ میرے خیال میں جوفرا آرچر عمدہ ایتھلیٹ اور دیکھنے میں اچھا لگنے والے بولر ہیں جو توقع کے مطابق بالنگ کر رہے ہیں۔
قومی ٹیم کے سابق کپتان نے کہا کہ انگلینڈ خوش قسمت ہے کہ انہیں مستقبل کا بولر ملا ہے، وہ روایتی طور پر ویسٹ انڈین بالرز کی طرح انتہائی خطرناک بالنگ کرنے کے عادی ہیں۔
وقار یونس نے کہا کہ جوفرا آرچر وسیم اکرم اور میرے سے مختلف بولر ہیں، ہمارا انداز کچھ اور ہوتا تھا جب کہ جوفرا آرچر تیز گیند اور باونسر سے اٹیک کرنے کی کوشش کرتے ہیں۔