پاکستانی شہری ہوتے ہوئے ممبئی میں جائیداد کیوں خریدی؟ عدنان سمیع پر جرمانہ

پاکستانی شہریت ترک کرکے بھارتی شہریت لینے والے گلوکار عدنان سمیع پر بغیر اجازت جائیداد کی خریداری پر بھاری جرمانہ عائد کردیا گیا۔

بھارتی میڈیا رپورٹس کے مطابق فارن ایکسچینج منیجمنٹ ایکٹ (فیما) کے اپیلٹ ٹریبونل نے گلوکار عدنان سمیع پر ریزرو بینک آف انڈیا کی اجازت کے بغیر ممبئی میں فلیٹ خریدنے پر 50 لاکھ بھارتی روپے کا جرمانہ کیا۔

عدنان سمیع نے 2003 میں پاکستانی شہری ہوتے ہوئے ممبئی میں 8 فلیٹس اور پارکنگ لاٹس خریدے تھے، بھارت میں کوئی بھی غیر ملکی شہری ریزرو بینک کی اجازت کے بغیر جائیداد نہیں خرید سکتا۔

شان شاہد اور ٹوئٹر صارفین نے گلوکار عدنان سمیع کو آڑے ہاتھوں لے لیا

عدنان سمیع واحد پاکستانی پیداوار ہے جس پر ہم سب شرمندہ ہیں، اسے بھارت ہی رکھیں، شان شاہد

خیال رہے کہ عدنان سمیع کو بھارتی شہریت 2016 میں دی گئی تھی تاہم انہوں نے یہ جائیدادیں اس وقت خریدیں جب وہ پاکستانی شہری تھے۔

2010 میں انفورسمنٹ ڈائریکٹوریٹ کے اسپیشل ڈائریکٹر (ممبئی) نے جائیداد ضبط کرنے اور 20 لاکھ روپے جرمانے کا حکم دیا تھا جس کے خلاف گلوکار نے اپیل کی تھی۔

اب اپیلٹ ٹریبونل نے 2010 کا مذکورہ حکم نامہ ختم کرتے ہوئے جرمانہ 20 لاکھ سے بڑھاکر 50 لاکھ کردیا ہے۔

عدنان سمیع کو جرمانے کی یہ رقم 3 ماہ میں ادا کرنا ہوگی اور وہ پہلے ہی 10 لاکھ بھارتی روپے جرمانہ ادا کرچکے ہیں۔

خیال رہے کہ عدنان سمیع نے 29 دسمبر 2003 کو ممبئی کے علاقے لوکھنڈوالا میں اوبرائے اسکائی کوآپریٹو ہاؤسنگ سوسائٹی میں مذکورہ جائیدادیں خریدی تھیں جن کی مالیت 2 کروڑ 53 لاکھ بھارتی روپے تھی۔

'بھارت میں رہنا والد کا فیصلہ، پاکستان میرا گھر ہے میں نے یہیں کام کرنا پسند کیا'

اذان خان پاکستانی شہریت ترک کر کے بھارتی شہریت حاصل کرنے والے موسیقار و گلوکار عدنان سمیع کے صاحبزادے ہیں۔

عدنان سمیع نے بعد ازاں پانچ فلیٹس اپنی اہلیہ صبا گلادری کے نام منتقل کردیے تھے تاہم بعد میں دونوں کی علیحدگی ہوگئی تھی۔

عدنان سمیع نے کارروائی کے دوران اپنے جواب میں بتایا کہ وہ اس بات سے واقف نہیں تھے کہ پاکستانی شہری بھارت میں غیر منقولہ جائیداد نہیں خرید سکتے۔

ٹریبونل نے اپنے فیصلے میں کہا کہ 'فلیٹس بھارتی روپوں سے خریدے گئے جو بھارت میں ہی کمائے گئے اور ان پر انکم ٹیکس بھی ادا کیا گیا جبکہ خریداری کیلئے بھارتی بینکوں سے قرض بھی لیے گئے اور یہ قرض بروقت ادا کردیے گئے'۔

ٹریبونل نے کہا کہ فلیٹس کی خریداری کے بعد عدنان سمیع نے بھارتی شہریت کیلئے درخواست دی اور انہیں یکم جنوری 2016 کو بھارتی شہریت دے دی گئی۔

دوسری جانب عدنان سمیع پر جرمانے کے بعد سوشل میڈیا پر تبصروں کا سلسلہ جاری ہے۔ چند سوشل میڈیا صارفین کی جانب سے طنز و مزاح والی ٹوئٹس کی گئی ہیں جس میں کہا گیا ہے کہ ’میجر عدنان سمیع مشکل میں پھنس گئے‘۔