قصور سے اغواء تین بچوں کی لاشیں مل گئیں
17 ستمبر ، 2019
قصور کے علاقے چونیاں میں ڈھائی ماہ کے دوران اغواء ہونے والے تین بچوں کی لاشیں مل گئیں جنہیں زیادتی کے بعد قتل کر کے لاشیں زمین میں دبائی گئیں۔
قصور کے قریب چونیاں شہر کے مختلف مقامات سے اغوا کیے گئے تین بچوں کی لاشیں جھاڑیوں سے مل گئیں، پولیس کے مطابق اغوا اور قتل کیے گئے بچوں میں فیضان، علی حسنین اور سلمان شامل ہیں، فیضان گزشتہ روز جبکہ سلمان اور علی حسنین ڈھائی ماہ قبل اغوا کیے گئے تھے، رانا ٹاؤن چونیاں کا رہائشی 12 سال کا بچہ عمران اب تک لاپتا ہے۔
پولیس کے مطابق ڈھائی ماہ کے دوران تین بچے آٹھ سالہ علی حسنین ، سلمان اور نو سالہ فیضان اغواء ہوئے۔
بچوں کی لاشیں اور ہڈیاں انڈسٹریل ایریا میں ریت کے ٹیلوں میں دبا دی گئی تھیں۔
پولیس کے مطابق تینوں لاشیں نکال کر پوسٹ مارٹم کیلئے اسپتال منتقل کر دی گئی ہیں، لاشوں کی حالت بہت خراب ہو چکی ہے اس لیے ان کا ڈی این اے ٹیسٹ اور فرانزک کرایا جائے گا۔
پولیس کے مطابق اسی عرصے میں اغوا ہونے والا 12 سالہ عمران تاحال لاپتہ ہے جس کی تلاش جاری ہے ۔
پولیس نے ملزمان کی گرفتاری کے لیے سرچ آپریشن شروع کر دیا ہے۔
