نواز شریف کے داماد کیپٹن (ر) صفدر 14 روزہ جوڈیشل ریمانڈ پر جیل منتقل
22 اکتوبر ، 2019
سابق وزیراعظم نواز شریف کے داماد کیپٹن (ر) محمد صفدر کو 14 روزہ جوڈیشل ریمانڈ پر جیل بھیج دیا گیا۔
کیپٹن ریٹائرڈ محمد صفدر کی درخواست ضمانت بھی عدالت میں جمع کرادی گئی جس پر عدالت نے پولیس کو 24 اکتوبر کیلئے نوٹس جاری کر دیا۔
گزشتہ روز سابق وزیراعظم نواز شریف کی طبیعت ناساز ہونے پر انہیں قومی احتساب بیورو (نیب) دفتر سے سروسز اسپتال لاہور منتقل کیا گیا تھا جس کے فوری بعد کیپٹن (ر) صفدر نے نواز شریف کو زہر دیے جانے کا خدشہ ظاہر کیا تھا۔
گزشتہ رات ہی سابق وزیراعظم کے داماد کو بھیرہ سے لاہور جاتے ہوئے راوی ٹول پلازہ پر گرفتار کیا گیا، اُنہیں 16 ایم پی او سمیت دیگر دفعات کے تحت درج مقدمے میں گرفتار کیا گیا اور یہ مقدمہ 13 اکتوبرکو تھانہ اسلام پورہ میں درج کیا گیا تھا۔
پولیس نے کیپٹن (ر) صفدرکو ضلع کچہری میں جوڈیشل مجسٹریٹ رانا آصف کی عدالت میں پیش کیا جہاں پولیس کی جانب سے ان کے جسمانی ریمانڈ کی استدعا کی گئی۔
عدالت نے کیپٹن (ر) صفدر کے جسمانی ریمانڈ کی استدعا مسترد کرتے ہوئے انہیں 14 روزہ جوڈیشل ریمانڈ پر جیل بھجوادیا اور انہیں 5 نومبر کو دوبارہ پیش کرنے کا حکم دیا۔
کیپٹن (ر) صفدر کیخلاف درج مقدمے میں 10سے زائد افراد جمع کرنے، پولیس مقابلے، کارِ سرکار میں مداخلت اور امِن عامہ میں خلل کےاندیشےجیسی دفعات شامل ہیں۔
ایف آئی آر کے مطابق کیپٹن ریٹائرڈ صفدر نے ایک ویڈیو بیان عوام کو حکومت کےخلاف اکسایا اوراحتجاجی تحریک میں شامل ہونے کی ترغیب دی تھی۔
خیال رہے کہ محمد صفدر کی گرفتاری سابق وزیراعظم نواز شریف کو قومی احتساب بیورو (نیب) لاہور کے دفتر سے سروسز اسپتال منتقلی کے کچھ دیر بعد ہوئی۔
گرفتاری سے قبل محمد صفدر نے اپنے بیان میں نواز شریف کو زہر دیے جانے کا خدشہ ظاہر کیا تھا جبکہ نواز شریف کے بیٹے حسین نواز نے بھی ایسے ہی خدشات ظاہر کیے ہیں۔
یاد رہے کہ قومی احتساب بیورو (نیب) کی حراست میں سابق وزیراعظم نواز شریف کا علاج لاہور کی سروسز اسپتال میں جاری ہے جہاں انہیں نگہداشت میں رکھا گیا ہے۔
