بھارتی سفارتکار کی کشمیر میں اسرائیلی طرز پر ہندوؤں کی آباد کاری کی تجویز

امریکا میں بھارتی سفارت کار کو مقبوضہ کمشیر میں اسرائیلی طرز پر ہندوؤں کی آبادکاری کی تجویز دینا مہنگا پڑگیا، بھارت سمیت دنیا بھر کے ذرائع ابلاغ کی جانب سے ان پر شدید تنقید  کی جارہی ہے۔

سوشل میڈیا پر ایک ویڈیو وائرل ہورہی ہے جس میں نیو یارک میں بھارتی قونصل جنرل سندیپ چکرورتی ایک تقریب میں کہتے نظر آرہے ہیں کہ مقبوضہ کشمیر میں بھی بھارت کو اسرائیل کی طرز کا منصوبہ بناتے ہوئے وہاں زیادہ سے زیادہ ہندوؤں کو آباد کرنا ہوگا۔

بھارتی قونصل جنرل کے مطابق جب مشرق وسطیٰ میں اسرائیلی یہ کرسکتے ہیں تو ہم مقبوضہ کشمیر میں ایسا کیوں نہیں کرسکتے۔

مقبوضہ وادی میں بھارتی لاک ڈاؤن کو 100 دن مکمل، کاروبار زندگی بدستور معطل

مقبوضہ کشمیرمیں بھارتی جارحیت جاری ہے، وادی میں کرفیو، شہادتیں اور گرفتاریاں رک نہ سکیں، عالمی برادری خاموش

سندیپ چکرورتی کے اس بیان کے بعد بھارت سمیت دنیا بھر میں انہیں تنقید کا نشانہ بنایا جارہا ہے۔

گزشتہ روز وزیراعظم عمران خان کا بھی اپنے ردعمل میں کہنا تھا کہ یہ بیان بھارت حکومت کی فسطائی سوچ اور ہندو انتہا پسند تنظیم آر ایس ایس کے نظریات ظاہر کرتا ہے۔

عمران خان کا کہنا تھا کہ مقبوضہ کمشیر میں مسلسل کرفیو اور لاک ڈاؤن کو 100 روز سے بھی زیادہ ہوچکے ہیں لیکن کشمیریوں پر اس بد ترین ظلم اور انسانی حقوق کی خلاف ورزیوں پر طاقتور ممالک صرف اور صرف اپنے تجارتی اور مالی مفادات کی وجہ سے خاموش ہیں۔ؔ

کشمیری ہندو پنڈتوں کی جانب سے بیان کی مذمت

بھارتی سفارت کا رکے بیان پر کمشیری پنڈتوں کی تنظیم کے سربراہ سنجے ٹکو کا کہنا ہے کہ اسرائیل طرز پرمقبوضہ کشمیر میں آباد کاری کی بات مضحکہ خیز ہے اور یہ لوگ سمجھتے ہیں کہ آرٹیکل 370 کے نفاذ کے بعد یہ جو چاہیں یہاں کرسکتے ہیں لیکن ہم انہیں اس کی اجازت نہیں دیں گے۔

ان کا کہنا تھا کہ بھارتی سفارت کا یہ بیان کشمیر کی مسلم آباد ی کے درمیان رہنے والے ہزاروں ہندوؤں کو خطرے میں ڈال دے گا۔

دہلی میں مقیم ایک اور کمشیری پنڈت کا کہنا ہے کہ یہ بیان ہمارے سیکولر آئین کے خلاف ہے اورہمارا کشمیر ایسے تجربات کے لیے نہیں ہے۔شرپسند عناصر ہمیں فرقہ وارانہ بنیادوں پر تقسیم کرنا چاہتے ہیں۔

بھارت نے مقبوضہ کشمیر کی خصوصی حیثیت ختم کر دی

آئین کے آرٹیکل 370 کو ختم کردیا گیا جو کشمیر کو اپنا آئین بنانے کی آزادی دیتا ہے،اس کے تحت دوسری ریاست کا شہری مقبوضہ کشمیر کا شہری نہیں بن سکتا نہ ہی وادی میں جگہ خرید سکتا ہے

واضح رہے کہ مقبوضہ کشمیر میں مسلسل116ویں روز بھی بھارتی لاک ڈاؤن جاری ہے۔ بڑھتی ہوئی سردی نے بھی پہلے سے مشکلات کا شکار کشمیریوں کی پریشانیوں میں اضافہ کر دیا ہے۔

مقبوضہ کشمیر میں خوف و ہراس کا ماحول اور غیر یقینی صورتحال برقرار ہے، دفعہ 144کے مسلسل نفاذ کے باعث معمولات زندگی مسلسل مفلوج ہیں۔ دکانیں، تجارتی مراکز، اسکول اور دفاتر بند ہیں جب کہ انٹرنیٹ ، موبائل فون سروسز بھی بدستور معطل ہے۔