12 فروری ، 2020
سائنس اور ٹیکنالوجی کے اس دور میں جہاں ہر نوعمر سوشل میڈیا اور انٹرنیٹ کا استعمال کر رہا ہے وہیں سب سے اشد ضرورت اس امر کی ہے کہ ہم نوجوانوں کے آن لائن تحفظ کے حوالے سے کیا کر رہے ہیں۔
نوعمر بچوں کی آن لائن حفاظت میں سب سے بڑا کردار والدین کا ہوتا ہے اس لیے ضروری ہے کہ والدین اپنے بچوں پر نظر رکھیں کہ وہ کیا کر رہے ہیں اور ساتھ ہی وہ بچوں کے انٹرنیٹ استعمال کرنے کا ایک وقت متعین کرلیں۔
آج ہم آپ کو نو عمر بچوں کی آن لائن حفاظت کے حوالے سے چند تجاویز بتانے والے ہیں جو آپ کے لیے کافی مددگار ثابت ہوں گی۔
موجودہ دور میں بچے انٹرنیٹ کی دنیا میں پرورش پا رہے ہیں تو اسی ضمن میں ضروری ہے کہ آپ اپنے بچوں کو نوعمری میں ہی ٹیکنالوجی اور اس کے اثرات اور آن لائن تحفظ کے حوالے سے بتائیں اور ان سے کھل کے بات چیت کریں تاکہ انہیں بھی یہ بات معلوم ہوجائے کہ ان کے لیے کیا چیز صحیح اور کیا غلط ہے۔
یہ بات قدرتی طور پر ہر بچوں میں پائی جاتی ہے جیسے جیسے بچے بڑے ہوتے جاتے ہیں ان میں ہر چیز کو لے کر تجسس بھی بڑھتا جاتا ہے، والدین کو چاہیے کہ وہ موبائل فون، لیپ ٹاپ اور ٹیبلٹس میں ’پیرنٹل کنٹرول‘ انسٹال کر دیں تا کہ اس کی مدد سے وہ یہ جان سکیں کے ان کا بچہ انٹرنیٹ پر کتنا وقت گزار رہا ہے جب کہ اس کی مدد سے غیر اخلاقی مواد بھی بلاک ہوجاتا ہے۔
ضروری ہے کہ والدین اپنے بچوں کے انٹرنیٹ کے استعمال، ایپس اور ویب سائٹس کے لیے ایک حد مقرر کردیں، بچوں کو پہلے ہی ان کی حدود سے آگاہ کر دیا جائے کہ اگر ان حدود سے باہر آئیں گے تو یہ نقصان کا باعث بن سکتا ہے۔
والدین کو چاہیے کہ وہ اپنی ذمہ داری کو سمجھیں کہ بچوں کے آن لائن تحفظ کی ذمہ داری صرف اور صرف آپ کی ہے اور آپ کے ہاتھوں میں ہی ہے۔ ضروری ہے کہ آپ اس حوالے سے ہر روز اپنے بچوں کی کاؤنسلنگ بھی کرتے رہیں۔
انٹرنیٹ کے حوالے سے جہاں بچوں کو تحفظ کے حوالے سے اگاہی دینا ضروری ہے تو وہیں والدین بچوں میں مثبت سوچ بھی ڈالیں۔
والدین کو چاہیے کہ وہ بچوں کو انٹرنیٹ کے مثبت پہلو بتائیں، انہیں انٹرنیٹ کے ذریعے سے پڑھائی اور معلوماتی ویب سائٹس سے متعارف کروائیں۔