26 فروری ، 2020
سوات میں نامعلوم افراد نے سینیئر صحافی جاویداللہ خان کو گولی مار قتل کردیا۔
36 سالہ جاویداللہ خان نامی صحافی کو منگل کی رات مٹہ میں گولی ماری گئی وہ اردو اخبار ’اوصاف‘ کے لیے بطور بیورو چیف کام کرتے تھے۔
فرانسیسی خبر رساں ایجنسی کے مطابق جاوید پولیس گارڈ کے ساتھ سفر کر رہے تھے کہ اچانک دو نامعلوم افراد نے اُن کی گاڑی پر گولیاں چلا دیں اور وہ موقع پر ہی جاں بحق ہوگئے۔
مقامی پولیس کے حکام محمد علی نے بھی اس واقع کی تصدیق کردی ہے، محمد علی کا مزید کہنا تھا کہ جاویداللہ خان کو باقاعدہ ہدف بنا کر قتل کیا گیا ہے۔
ایمنیسٹی انٹرنیشنل نے اپنے بیان میں کہا ہے کہ جاویداللہ خان غیر معمولی طور پر بہادر صحافی تھے اور ان کے قتل کی تحقیقات کی جائیں۔
ابھی تک کسی بھی گروپ نے اس حملے کی ذمےداری قبول نہیں کی ہے۔