کے پی اسمبلی میں اسپیکر کے رویے کیخلاف اپوزیشن ارکان ہتھوڑے لے آئے

خیبرپختونخوا اسمبلی میں حزب اختلاف کے ارکان نے اسپیکر مشتاق غنی کے رویے کیخلاف ربڑ کے ہتھوڑوں سے ڈیسک بجاکر انوکھا احتجاج کیا۔

خیبر پختونخوا اسمبلی اجلاس اسپیکر مشتاق غنی کی زیر صدارت ایک گھنٹہ 24 منٹ تاخیر سے شروع ہوا تو 11 ویں سیشن کے چھٹے اجلاس کے دوران بھی اپوزیشن اراکان احتجاج کرتے رہے۔ 

عوام دو کے بجائے ایک روٹی کھا کر گزارا کریں: اسپیکر کے پی اسمبلی کا مشورہ

ابھی ملک مشکل معاشی حالات سے گزر رہا ہے، آگے وقت آئے گا جب عوام کو ڈھائی روٹی کھانے کو ملے گی: مشتاق غنی

اپوزیشن اراکین ڈیسک بجاتے رہے جبکہ بعض ارکان ڈیسک بجانے کے لیے ربڑ کے ہتھوڑوں کا استعمال کرتے نظر آئے اور کچھ سیٹھیاں بجاتے رہے جس سے ایوان مچھلی بازار کا منظر پیش کرنے لگا۔

اسپیکر مشتاق غنی اور سیکیورٹی اسٹاف اپوزیشن ارکان کو شور شرابا کرنے سے روکتے رہے لیکن ناکام رہے تاہم اسپیکر نے ایجنڈے پرعمل جاری رکھا۔ 

اس دوران اسپیکر نے سیکیورٹی اسٹاف اور پولیس اہلکاروں کو ایوان میں طلب کرتے ہوئے اپوزیشن اراکین سے ہتھوڑے لینے کا حکم دیا لیکن اپوزیشن ارکان نے ہتھوڑے دینے سے انکار کیا۔

ایک گھنٹہ 24 منٹ کی تاخیر سے شروع ہونے والا اسمبلی اجلاس محض 17 منٹ تک جاری رہ سکا اور اسپیکر نے اجلاس 16 مارچ تک ملتوی کردیا۔ 

خیال رہے کہ خیبرپختونخوا میں پاکستان تحریک انصاف کی حکومت ہے اور سوات سے تعلق رکھنے والے محمود خان وزیراعلیٰ ہیں۔

کے پی اسمبلی میں جمعیت علمائے اسلام (ف)، عوامی نیشنل پارٹی (اے این پی)، مسلم لیگ (ن) اور  پاکستان پیپلزپارٹی (پی پی پی) اپوزیشن میں ہیں جبکہ جے یو آئی کے اکرم درانی قائد حزب اختلاف ہیں۔