کوئٹہ: مشتعل افراد کے ہاتھوں نوجوان کے قتل کی تحقیقات کیلئے جے آئی ٹی تشکیل

کوئٹہ کے علاقے ہزارہ ٹاؤن میں مشتعل افراد کے ہاتھوں نوجوان کے قتل کی تحقیقات کے لیے مشترکہ تحقیقاتی ٹیم (جے آئی ٹی) تشکیل دے دی گئی۔

بلوچستان حکومت کی جانب سے جاری نوٹیفکیشن کے مطابق 8 رکنی جے آئی ٹی ایس ایس پی انوسٹی گیشن اسد ناصر کی سربراہی میں تشکیل دی گئی ہے۔

نوٹیفکیشن میں بتایا گیا ہے کہ جے آئی ٹی 15 روز میں واقعے کی تحقیقاتی رپورٹ حکومت کو پیش کرے گی۔ 

کوئٹہ میں مبینہ لین دین کے تنازعے پر مشتعل افراد کے تشدد سے نوجوان جاں بحق

ورثاء نے کوئٹہ کے وسطی علاقے میں سیکیورٹی زون کے قریب زرغون روڈ پر میت رکھ کر احتجاج کیا اور ملزمان کے خلاف فوری کارروائی کا مطالبہ کیا

خیال رہے کہ دو روز قبل  ہزارہ ٹاؤن کوئٹہ میں مبینہ لین دین کے تنازع پر چند افراد کے تشدد سے ایک نوجوان جاں بحق اور دو زخمی ہوگئے  تھے۔

واقعے میں زخمی ہونے والے نوجوان سول اسپتال میں زیر علاج ہیں جب کہ جاں بحق نوجوان کی شناخت بلال نورزئی کے نام سے ہوئی تھی۔

 وزیراعلیٰ بلوچستان جام کمال نے واقعے نوٹس لیتے ہوئے  ہدایت کی ہے کہ واقعے میں ملوث عناصر کو کیفرکردار تک پہنچایا جائے۔

واقعے کےحوالے سے غفلت برتنے پر علاقہ ایس ایچ او بروری تھانہ اور ڈیوٹی افسر سمیت 5 اہلکاروں کو معطل بھی کیاگیاتھا۔