کے الیکٹرک مافیا بنتا جارہا ہے، وزيراعظم کی ہدایات پر بھی عمل نہیں کررہا: ایم کیو ایم

متحدہ قومی موومنٹ (ایم کیو ایم) پاکستان کے سینیئر ڈپٹی کنوینر عامرخان و دیگر اراکین رابطہ کمیٹی نے پریس کانفرنس کی اور کے الیکٹرک پر شدید تنقید کی۔ 

کراچی میں پریس کانفرنس کرتے ہوئے عامر خان کا کہنا تھا کہ گزشتہ کئی ماہ سے کراچی کے شہریوں کو لوڈشیڈنگ کے عذاب میں مبتلا کیا ہوا ہے، کے الیکٹرک شہریوں سے زائد بلنگ کے ذریعے اربوں روپے بٹور رہا ہے۔

تحریک انصاف کی قیادت کا کے الیکٹرک کیخلاف سپریم کورٹ جانے کا اعلان

ہم کے الیکٹرک کے خلاف سپریم کورٹ جائیں گے، چیف جسٹس سے ازخود نوٹس لینے کی اپیل کرتا ہوں: فردوس شمیم نقوی

انہوں نے کہا کہ کراچی کے شہری بدترین لوڈشیڈنگ کو جھیل رہے ہیں، ہم نے کئی مرتبہ کے الیکٹرک انتظامیہ سے لوڈشیڈنگ پر بات کی لیکن  کے الیکٹرک مافیا کاگروپ بنتا جارہا ہے جو کسی کو خاطر میں نہیں لاتے۔

عامر خان کا کہنا تھا کہ وزیراعظم پاکستان سے بھی کراچی میں لوڈ شیڈنگ کے حوالے سے بات کی لیکن کے الیکٹرک وزیراعظم کی گزارشات پر بھی عمل کرنے کو تیار نہیں، مسئلہ حل کرنے کے بجائے نیپرا نے مزید ٹیرف میں اضافہ کردیا۔

خیال رہے کہ جون کے مہینے میں گرمی بڑھتے ہی شہر کے مختلف علاقوں میں14 سے 16 گھنٹے تک بجلی غائب رہنے لگی تھی اور اب بارش کا بہانہ بناکر کے الیکٹرک کی جانب سے شہر میں غیر اعلانیہ لوڈشیڈنگ کا سلسلہ جاری ہے۔

شہر میں لوڈشیڈنگ کا دورانیہ 12 سے 14 گھنٹے تک ہوگیا ہے جس کے باعث شدید گرمی کے موسم میں شہریوں کو مشکلات کا سامنا ہے۔