06 اگست ، 2020
ریلوے حکام نےاسسٹنٹ ٹرانسپورٹ آفیسر لاہور سیدہ مرضیاة الزہرہ کو لاہور ریلوے اسٹیشن کےاسٹیشن مینجر کا اضافی چارج دے دیا جس کے بعد وہ پاکستان ریلویز کی پہلی خاتون اسٹیشن مینیجر بن گئی ہیں۔
رپورٹ کے مطابق ریلوے حکام نے اے ٹی او لاہور سیدہ مرضیاۃ الزہرہ کو لاہور ریلوے اسٹیشن کی اسٹیشن مینیجر کی آسامی پر تعینات کیا ہے اور اسٹیشن ماسٹر لاہور کینٹ یونس بھٹی سے اسٹیشن مینیجر لاہور کا اضافی چارج واپس لے لیا ہے۔
ریلوے ذرائع نے بتایا کہ سیدہ مرضیاة الزہرہ پاکستان ریلویز کی پہلی خاتون اسٹیشن مینجر بن گئی ہیں۔
دوسری جانب ریلوے سمپارس یونین نے اسٹیشن مینیجر کی آسامی پر سی ایس پی آفیسر کی تعیناتی کےخلاف احتجاج کی کال دی ہے۔
یونین کے مرکزی چیئرمین محمد عرفان نےاس تعیناتی پر تحفظات کا اظہارکرتے ہوئےکہا ہےکہ نوٹیفکیشن منسوخ نہ ہوا تو وہ احتجاج کریں گے۔