10 اگست ، 2020
فیصل آباد میں محکمہ وائلڈ لائف نے کارروائی کرتے ہوئے گھر میں غیر قانونی طور پر پالے گئے بھیڑیے کو قبضے میں لے کر مالک کو گرفتار کرلیا۔
محکمہ وائلڈ لائف فیصل آباد کو واپڈا ٹاؤن کے رہائشی عرفان اسلم نے شکایت کی تھی کہ اس کے محلہ دار ارسلان یعقوب نے گھر میں خطرناک جنگلی بھیڑیا رکھا ہوا ہے۔
محکمہ وائلڈ لائف کی ٹیم نے کارروائی کرتے ہوئے ارسلان کو حراست میں لے کر اسے پالتو بھیڑیے سمیت مقامی عدالت میں پیش کردیا۔
عدالت نے ملزم کو 10ہزار روپے جرمانہ عائد کرتے ہوئے بھیڑیا محکمہ وائلڈ لائف کے حوالے کرنے کا حکم دے دیا۔
اسسٹنٹ ڈائریکٹر وائلڈ لائف عبدالرزاق گل کے مطابق گھر میں بھیڑیا پالنا ممنوع ہے، عدالتی حکم پر بھیڑیا وائلڈ پارک منتقل کیاجائےگا۔