Can't connect right now! retry

انٹرٹینمنٹ
06 اکتوبر ، 2020

ارباز خان نے سشانت کیس میں بدنام کرنیوالوں پر ہتک عزت کا مقدمہ کردیا

فوٹو: فائل 

ممبئی: بالی وڈ اداکار و پروڈیوسر ارباز خان نے سشانت سنگھ کیس میں ملوث کیے جانے پر ہتک عزت کا مقدمہ کردیا۔

بھارتی میڈیا کے مطابق اداکار ارباز خان نے ممبئی کی سول کورٹ میں دائر مقدمے میں وبھور انند، ساکشی بھنڈاری اور نامعلوم افراد کو نامزد کیا ہے جو سوشل میڈیا پر سشانت سنگھ راجپوت کی خودکشی کے معاملے میں ان کے ملوث ہونے کا الزام عائد کررہے تھے۔

بھارتی میڈیا کےمطابق ارباز خان کا کہنا ہے سشانت سنگھ کے کیس میں متعدد سوشل میڈیا پلیٹ فارمز، فیس بک، ٹوئٹر اور یوٹیوب پر ان کے اور ان کے اہل کانہ کا نام بدنام کیا جا رہا ہے۔

اداکار ارباز خان کے مقدمے کی جوابی کارروائی میں ممبئی سول کورٹ نے تمام نامزد ملزمان کے خلاف عبوری حکم نامہ جاری کرتے ہوئے کہا ہے کہ تمام تر ہتک آمیز پیغامات، پوسٹس اور ٹوئٹس کو فوری ہٹایا جائے۔

سشانت سنگھ کی خودکشی کیس کا پس منظر

خیال رہے کہ رواں سال 14 جون کو 34 سالہ اداکار سشانت سنگھ راجپوت ممبئی میں اپنے فلیٹ میں مردہ حالت میں پائے گئے تھے جس کے بعد ان کے مداحوں کی جانب سے سشانت سنگھ راجپوت کی موت کے معاملے پر سی بی آئی سے تفتیش کرنے کا مطالبہ کیا جا رہا تھا۔

بعد ازاں سشانت گھر والوں نے ان کی دوست ریا چکرورتی کو اداکارکی خودکشی کی وجہ قرار دیا تھا اور ان کے خلاف بہار میں مقدمہ بھی درج کرایا تھا جس کے بعد معاملہ سپریم کورٹ پہنچ گیا تھا۔

سشانت کے گھر والوں نے ریا چکرورتی پر الزام لگایا ہے کہ انہوں نے سشانت سے پیسے کیلئے تعلقات قائم کیے، اسے نشے کا عادی بنایا ، اپنے فائدے کیلئے استعمال کیا اور ایسے حالات کا شکار کردیا کہ وہ انتہائی قدم اٹھانے پر مجبور ہوگیا۔

سپریم کورٹ نے اپنے فیصلے میں بالی وڈ اداکار سُشانت سنگھ راجپوت کی مبینہ خودکشی کی تحقیقات بھارت کی تحقیقاتی ایجنسی سینٹرل بیورو آف انویسٹی گیشن (سی بی آئی) کو دینے کا حکم دیاتھا۔

ریا چکرورتی سشانت کے والدین کی جانب سے عائد کیے جانے والے الزامات کو مسترد کرتی آئیں ہیں اور وہ خود وزیراعظم مودی اور وزیر داخلہ امیت شاہ سے سشانت کی موت کی شفاف تحقیقات کا مطالبہ کرتی رہی ہیں۔

مزید خبریں :

Notification Management


پاکستان
دنیا
کاروبار
کھیل
انٹرٹینمنٹ
صحت و سائنس
دلچسپ و عجیب

ڈیسک ٹاپ نوٹیفکیشن کے لیے سبسکرائب کریں
Powered by IMM