پاکستان
Time 13 جنوری ، 2021

’کیا سیکرٹری داخلہ دیر سے اٹھتے ہیں؟ ابھی وارنٹ جاری کردیتے ہیں‘، عدالت برہم

امریکی صحافی ڈینئل پرل قتل کیس میں بریت کے باوجود ملزمان کی رہائی نہ ہونے کیخلاف توہین عدالت کی درخواست پر سندھ ہائی کورٹ نے چیف سیکرٹری اور سیکرٹری داخلہ کو آئندہ سماعت پرپیش ہونے کا حکم دیتے ہوئے 20 جنوری کو فریقین سے جواب طلب کرلیا۔

عدالت نے ریمارکس دیے کہ کیا سیکرٹری داخلہ سندھ دیر سے اٹھتے ہیں؟ ہم ابھی دونوں کے وارنٹ جاری کردیتے ہیں، انہیں معلوم نہیں، ان کے خلاف توہین عدالت کا کیس چل رہا ہے۔

ڈینئل پرل قتل کیس میں بریت کے باوجود ملزمان کی رہائی نہ ہونے کیخلاف توہین عدالت کی درخواست کی سماعت سندھ ہائیکورٹ میں ہوئی۔

سپرنٹنڈنٹ سینٹرل جیل حسن سہتو اور اسپیشل سیکرٹری داخلہ عدالت میں پیش ہوئے۔

چیف سیکرٹری سندھ اور سیکرٹری داخلہ کی عدم پیشی پر عدالت نے برہمی کا اظہار کیا۔ عدالت کا کہنا تھا کہ ابھی چیف سیکرٹری سندھ اور سیکرٹری داخلہ کے وارنٹ جاری کردیتے ہیں، ان کو معلوم نہیں ان کے خلاف توہین عدالت کا کیس چل رہا ہے۔

عدالت نے چیف سیکرٹری سندھ اور سیکرٹری داخلہ کو آئندہ سماعت پرپیش ہونے کا حکم دیتے ہوئے 20 جنوری کو فریقین سے جواب طلب کرلیا۔

مزید خبریں :