قدیم امریکی باشندے بائیڈن کی تقریب حلف برداری پر ناراض کیوں ہیں ؟
21 جنوری ، 2021
نومنتخب امریکی صدر جوبائیڈن کی تقریب حلف برداری میں معروف گلوکارہ جینیفر لوپیز کے گائے گئے گانے کی شاعری کو متنازع ہونے کے باعث تنقید کا نشانہ بنایا جارہا ہے۔
قدیم امریکی باشندوں (ریڈ انڈینز) کی جانب سے اعتراض کیا گیا ہےکہ جینیفر لوپیز کے گانے'This Land Is Your Land' کی شاعری نوآبادیاتی دور سے تعلق رکھتی ہے۔
سوشل میڈیا پر تنقید کرتے ہوئے قدیم امریکی باشندوں نے حلف برداری کی تقریب میں اس گانے کو مقامی امریکیوں کی نسل کشی اور ان کی زمین پر قبضے کا جشن بھی قرار دیا ہے۔
ایک صارف کا کہنا ہے کہ بائیڈن نے تمام امریکیوں میں اتحاد کا وعدہ کیا تھا تاہم انہوں نے اپنا آغاز ہی ایسے گانے سے کیا ہے جو مقامی باشندوں کو ختم کرنے کی علامت ہے۔
قدیم امریکی باشندوں کا کہنا ہے کہ وہ اس وقت سے ہی ناپسند کرتے ہیں جب اس گانے کو 1940 میں لکھا گیا تھا ، کیونکہ یہ نہ صرف نو آبادیاتی دور کی یاد دلاتا ہے بلکہ اس میں امریکی وطن پرستی کو ابھارا گیا ہے جب کہ مقامی باشندوں کو نظر انداز کیا گیا ہے۔
ان کا یہ بھی کہنا ہے کہ یہ زمین ہماری تھی جس پر نوآبادیاتی دور میں معاہدوں کی خلاف ورزی اور مقامی باشندوں کی نسل کشی کرنے کے بعد نئے قوانین کے ذریعے امریکیوں کا وطن بنایا گیا۔
