09 مارچ ، 2021
برطانوی شاہی خاندان کی بہو میگھن مارکل اور شہزادہ ہیری کا امریکی میزبان اوپرا ونفری کو دیا گیا انٹرویو جہاں برطانوی خاندان کے بہت سے رازو نیاز سے پردہ اٹھانے کا سبب بنا وہیں اس نے آسکرز کے بعد سب سے زیادہ اہمیت کے حامل گولڈن گلوب ایوارڈ اور امریکا میں ٹیلی ویژن کی دنیا کے سب سے معتبر ترین ایمی ایوارڈ جیسی تقریبات کو بھی پیچھے چھوڑ دیا۔
غیر ملکی میڈیا رپورٹ کے مطابق سی بی سی پرائم ٹائم اسپیشل کے پیش کردہ اوپرا ونفری کے شو میں ہیری اور میگھن مارکل کے انٹرویو کے دن ناظرین کی تعداد میں بہترین اضافہ ریکارڈ کیا گیا۔
رپورٹ کے مطابق ایک کروڑ 70 لاکھ سے بھی زائد افراد یہ جاننے کے لیے شو میں دلچسپی لے رہے تھے کہ آیا میگھن اور ہیری کیا کہیں گے۔
2گھنٹے کے خصوصی پروگرام میں 18 سے 49 سال کے درمیانی عمر کے افراد کی 2.6ریٹنگ ریکارڈ کی گئی اور جب انٹرویو کا موازنہ گزشتہ ایمی اور گولڈن گلوب ایوارڈز سے کیا گیا تو انٹرویو ریٹنگ میں دنیا کی مقبول ترین ایوارڈ تقریبات کو بھی پیچھے چھوڑ چکا تھا۔
رپورٹ میں بتایا گیا ہے کہ گزشتہ برس ستمبر میں منعقد کیے جانے والے ایمی ایوارڈ کے ناظرین کی تعداد 6.4 ملین جب کہ 1.3 ریٹنگ تھی اور حال ہی میں گولڈن گلوب ایوارڈ کے ناظرین کی تعداد 6.4 ملین اور 1.5 ریٹنگ تھی۔
خیال رہے کہ اس سے قبل شہزادہ ہیری کی والدہ شہزادی ڈیانا کا 1995 میں غیر ملکی صحافی کو دیے گئے انٹرویو نے بھی 23 ملین ناظرین کے ساتھ ایک ریکارڈ قائم کیا تھا۔