وزیراعظم کو ویکسین لگنے سے پہلے کورونا ہوا ہوگا: ڈاکٹر عبدالباری
20 مارچ ، 2021
کراچی میں انڈس اسپتال کے سربراہ ڈاکٹر عبدالباری کا کہنا ہے کہ ویکسین لگانے کے بعد کورونا مثبت نہیں آتا، وزیراعظم کو ویکسین لگنے سے قبل ہی کورونا ہوا ہو گا۔
یاد رہے کہ وزیراعظم کے معاون خصوصی برائے صحت ڈاکٹر فیصل سلطان کے مطابق وزیراعظم عمران خان کا کورونا ٹیسٹ مثبت آ گیا ہے۔
وزیراعظم نے جمعرات یعنی دو روز قبل کورونا کی ویکسین بھی لگوائی تھی۔
اس حوالے سے جیو نیوز سے بات کرتے ہوئے ڈاکٹر عبدالباری بتایا کہ ویکسین لگانے کے بعد کورونا نہیں ہوتا، وزیراعظم کا یقیناً 5 سے 7 روز قبل کورونا کا ایکسپوژر ہوا ہوگا اس لیے اب ان کا ٹیسٹ مثبت آیا ہے۔
ویکسین کے بعد اینٹی باڈیز کب بنتی ہیں؟
ڈاکٹر عبدالباری نے کہا کہ ویکسین لگنے کے 2 سے 3 ہفتوں کے بعد اینٹی باڈیز بنتی ہیں اسی لیے چینی ویکیسین کی دو ڈوز لگائی جاتی ہیں تاکہ اینٹی باڈیز زیادہ بنیں۔
ڈاکٹر عبدالباری کا کہنا ہے کہ امید ہے کہ وزیراعظم کو علامات بہت کم ہوں گی، کیونکہ وہ خود کو فٹ بھی رکھتے ہیں اور آنے والے دنوں میں ویکسین کی وجہ سے ان کی اینٹی باڈیز بھی بننا شروع ہو جائیں گی۔
