کورونا سے ہلاک بھارتی یوٹیوبر کی اہلیہ نے شوہر کی موت سے پہلے کی ویڈیو جاری کردی

بھارتی اداکار و یوٹیوبر راہول وہرا کی اہلیہ نے اسپتال کی غلفت اور آکسیجن نا ملنے کو شوہر کی موت کی وجہ قرار دیا۔

’اچھا علاج ہوتا تو میں بچ جاتا‘، معروف بھارتی یوٹیوبر کورونا سے چل بسے

35 سالہ یوٹیوبر میں کورونا کی تشخیص ہوئی تھی جس کے بعد وہ دلی کے ایک اسپتال میں زیرعلاج تھے

گزشتہ روز 35 سالہ معروف یوٹیوبر راہول وہرا کورونا سے چل بسے تھے۔ اپنی موت سے ایک روز قبل فیس بک پر پوسٹ میں لکھا تھا کہ اگر مجھے اچھا علاج مل جاتا تو میں بچ جاتا۔

اب راہول وہرا کی اہلیہ نے اسپتال پر علاج کی بہتر سہولتیں نہ دینے کا الزام عائد کیا ہے اور شوہر کی آخری دنوں کے علاج کی ویڈیو پوسٹ کی ہے۔

ان کی اہلیہ نے ویڈیو پوسٹ کرتے ہوئے لکھا کہ میرا راہول چلا گیا لیکن کسی کو نہیں پتا کیسے گیا، راجیو گاندھی اسپتال میں اس طرح سے علاج کیا جاتا ہے، امید کرتی ہوں میرے شوہر کو انصاف ملے گا۔

ویڈیو میں راہول کو اسپتال کے بیڈ پر آکسیجن لگا ہوا ہے اور وہ اکھڑتی سانس کےساتھ بتا رہے ہیں کہ اس وقت آکسیجن کی بہت قیمت ہے اور اس کے بغیر مریض کچھ بھی نہیں۔

انہوں نے بتایا کہ ماسک سے آکسیجن نہیں آرہی ہے بلکہ پانی آرہا ہے، میں اسپتال عملے کو آوازیں لگاتا ہوں کوئی آتا ہی نہیں ہے۔

خیال رہے کہ راہول وہرا کو راجیو گاندھی اسپتال سے دوسرے اسپتال بھی منتقل کیا گیا تھا تاہم وہ جانبر نہ ہوسکے تھے۔