12 مئی ، 2021
کورونا وائرس سے متاثرہ افراد کو دوران بیماری تو کئی مسائل کا سامنا کرنا ہی پڑتا ہے لیکن مختلف تحقیقات میں بیماری سے صحتیاب ہونے کے بعد جسم کے کسی بھی مخصوص حصے میں منفی اثرات سے متعلق لوگوں کو آگاہی فراہم کرنا بھی بہت ضروری ہوتا ہے۔
اسی حوالے سے حال ہی میں برطانیہ سے تعلق رکھنے والے وبائی امراض کے ماہر ٹم اسپیکٹر نے ایک نئے منفی اثر کے بارے میں لوگوں کو بتایا ہے جو کہ کئی مریضوں پر تحقیق کے بعد سامنے آیا ہے۔
سوشل میڈیا سائٹ ٹوئٹر پر ناخنوں کی تصویر اپ لوڈ کرتے ہوئے ٹم اسپیکٹر نےکورونا سے صحتیاب ہونے والے افراد سے سوال پوچھا کہ کیا آپ کے ناخن اس طرح عجیب دکھائی دیتے ہیں؟
انہوں نے وضاحت دیتے ہوئے بتایا کہ دن بدن وبائی مرض ختم ہونے کے بعد مریضوں میں اس طرح کے ناخن دیکھے جا رہے ہیں۔
تصویر میں دیکھا جاسکتا ہے کہ ناخن کس طرح بڑھنے کے بعد ایک لکیر چھوڑے ہوئے ہیں۔ انہوں نے یہ بھی بتایا کہ اس کا کوئی اندرونی اثر نہیں ہو گا جیسا کہ درد وغیرہ۔
مذکورہ پوسٹ پر کئی صارفین نے اس بات سے اتفاق کیا اور بتایا کہ ان کے ناخن میں واقعی ایسی تبدیلی رونما ہوئی ہے اور وہ اس کی وجہ سے پریشان بھی ہیں۔
تاہم پریشانی کی کوئی بات نہیں ہے، دراصل یہ بیماری جسم کے دیگر اندرونی اعضا کی طرح ناخنوں پر بھی گہرے اثرات مرتب کرتی ہے جس کے باعث ان کی شکل میں تھوڑی سی تبدیلی ہو جاتی ہے۔