حکومت کی شہباز شریف کو باہر جانےکی اجازت کےفیصلےکیخلاف اپیل کی جلد سماعت کی استدعا
18 مئی ، 2021
وفاقی حکومت نے مسلم لیگ ن کے صدر اور اپوزیشن لیڈر شہباز شریف کو باہر جانے کی اجازت دینے کے لاہور ہائی کورٹ کے فیصلے کے خلاف اپیل جلد سماعت کے لیے مقرر کرنے کے لیے سپریم کورٹ میں درخواست دائر کردی۔
وفاقی حکومت کی جانب سے سپریم کورٹ میں دائر درخواست میں استدعا کی گئی ہےکہ کیس پر جلد سماعت نہ ہونے سے ناقابل تلافی نقصان ہوگا، انصاف کے تقاضوں کو مد نظر رکھتے ہوئے اپیل جلد سماعت کے لیے مقرر کی جائے۔
خیال رہے کہ وفاقی حکومت نے لاہور ہائی کورٹ کے7 مئی کے فیصلے کےخلاف سپریم کورٹ میں اپیل دائر کر رکھی ہے۔
لاہور ہائی کورٹ نے فیصلہ دیا تھا کہ شہباز شریف کو علاج کے لیے جانے کی اجازت دی جائے ۔
