رونالڈو کے بعد مسلم فٹبالر نے بیئر کی بوتل ہٹادی، یوئیفا ایکشن میں آگیا

یونین آف دی یورپین فٹبال ایسوسی ایشن (یوئیفا) نے یورو کپ 2020 کے دوران کھلاڑیوں کی جانب سے کی جانب والی پریس کانفرنسز میں اسپانسرڈ مشروبات کی بوتلوں کو ہٹانے کے واقعات پر وارننگ جاری کی ہے۔

یوئیفا نے وارننگ جاری کی ہے کہ پریس کانفرنس کے دوران جس بھی ٹیم کا کھلاڑی اسپانسرز کی جانب سے فراہم کردہ مشروبات کی بوتلیں ہٹائے گا اس کی ٹیم کو بھاری جرمانہ ادا کرنا ہوگا۔

خیال رہے کہ رواں ہفتے پیر کو میچ سے قبل پریس کانفرنس کے لیے آنے والے پرتگال کے اسٹار فٹبالر کرسٹیانو رونالڈو نے کوکا کولا کی بوتلیں ہٹا کر پانی کی بوتل سامنے رکھ دی تھی  جس کے بعد کوکا کولا کے شیئرز کی قیمت گر گئی تھی اور اسے 4 ارب ڈالرز کا نقصان ہوا تھا۔

بعد ازاں اگلے روز مسلم فٹبالر فرانس کے مڈفیلڈر پوگبا نے پریس کانفرنس میں اپنے سامنے سے بیئر کی بوتل ہٹائی جبکہ بدھ کو اٹلی کے فٹبالر مینوئل لوکاٹیلی نے بھی کوکا کولا کی بوتلوں کو پانی کی بوتل سے تبدیل کیا۔

رونالڈو کے معمولی عمل سے کوکاکولا کو اربوں ڈالرز کا نقصان

خیال رہے کہ کوکاکولا یورو کپ 2020 کا آفیشل اسپانسر پارٹنر ہے اور فٹبال کے تقریباً تمام ٹورنامنٹس میں بڑا اسپانسر ہوتا ہے

متواتر ان واقعات کے بعد یوئیفا ایکشن میں آیا اور اس نے ٹیموں کو وارننگ جاری کرتے ہوئے کہا کہ ’اسپانسرز اور پارٹنرشپس یورپ بھر میں فٹبال کے فروغ اور ٹورنامنٹ کے انعقاد کا اہم جزو ہوتے ہیں‘۔

یوئیفا کا کہنا ہے کہ کھلاڑی کنٹریکٹ کے تحت ٹورنامنٹ کے قواعد و ضوابط پر عمل کرنے کے پابند ہیں اور اگر انہوں نے ایسا نہ کیا تو انضباطی کارروائی کی جاسکتی ہے البتہ یوئیفا کی جانب سے کھلاڑیوں پر براہ راست جرمانے نہیں ہوں گے بلکہ ٹیموں کو جرمانہ کیا جائے گا۔