بلوچستان کے 5 اضلاع بارشوں کے بعد سیلاب سے متاثر
14 جولائی ، 2021
بلوچستان کے اضلاع ہرنائی اور سبّی میں بارشوں کے بعد دریائے ناڑی میں اونچے درجے کا سیلاب ہے جب کہ سبّی کے دو گاؤں مل چانڈیہ اور رضا چانڈیہ میں سیلابی پانی داخل ہوگیا ، کئی مکانات ڈوب گئے اور دیواریں گرگئیں ۔
ڈی جی پی ڈی ایم اے نصیر ناصر نے جیو نیوز سے بات چیت کرتے ہوئے بتایا کہ حالیہ بارشوں سے بلوچستان کے 5 اضلاع سبی ،سوراب ،موسٰی خیل ،چاغی اور کوہلو میں نقصانات ہوئے ہیں ، ان اضلاع میں حالیہ بارشوں کے دوران مختلف واقعات میں 5 افراد جان بحق بھی ہوئے ہیں۔
نصیر خان ناصر نے بتایا کہ بدھ کو دریائے تلی میں سیلابی پانی انے اور بند ٹوٹ جانے سے سبّی کےچانڈیا گاؤں میں سیلابی پانی داخل ہوگیا ،جس سےکافی مکانات گر گئے ہیں،جن کی تفصیلات ضلعی انتظامیہ سے حاصل کی جارہی ہیں۔
انہوں نے بتایا کہ کے متاثرہ دیہات میں ریلیف کا کام شروع کردیا گیا ہے ،ٹینٹ ،کھانے پینے کاسامان اور دیگر امدادی اشیا کے ٹرک روانہ کردیے گئے ہیں ،ا س کے علاوہ ایمبولینسز اور میڈیکل ٹیمیں بھی بھجوادی ہیں۔
نصیر ناصر نے بتایا کہ صوبے کے تمام ڈپٹی کمشنروں کو ہنگامی صورتحال سے نمٹنے کیلیے فنڈز کا اجراء کردیا ہے، پی ڈی ایم اے کے ملازمین کی چھٹیاں بھی منسوخ کردی گئی ہیں۔
