ایک پاکستانی کی بھارتی شہری کو گمشدہ والٹ لوٹانے کی انمول داستان
01 اگست ، 2021
ہم نے کئی ایسے واقعات سنے ہیں جن میں سوشل میڈیا کی طاقت استعمال کر کے گمشدہ لوگ اور چیزیں ان کے پیاروں کو واپس مِلی ہیں تاہم آج ہم آپ کو ایک ایسا انوکھا واقعہ بتائیں گے جس میں ایک پاکستانی لڑکے نے سوشل میڈیا کی مدد کے بغیر ہندوستانی شخص کی مدد کی۔
کہانی کا آغاز 29 جولائی کو اس وقت ہوا جب لندن میں مقیم لاہور سے تعلق رکھنے والے غازی تیمور کو ایک گمشدہ والٹ ملا، انہوں نے ٹوئٹر پر تصویر شیئر کی اور بتایا کہ بٹوے میں موجود بینک کارڈ سے معلوم ہوا کہ یہ کسی 'راہول' نامی شخص کا ہے، اب اسے تلاش کرنے کا وقت ہے۔
غازی نے صارفین کو واقعے سے مطلع رکھنے کا وعدہ بھی کیا۔
انہوں نے اگلی ٹوئٹ میں بتایا کہ اس نام کا بندہ انہیں سوشل میڈیا پر نہیں مِلا۔
ایک اور ٹوئٹ میں غازی نے کہا کہ گوگل سرچ امیج تجویز کر رہا ہے کہ راہول کا تعلق گجرات، بھارت سے ہے لیکن میرا نہیں خیال کہ یہ وہی راہول ہے۔
تیمور نے بتایا کہ انہوں نے اسے لنکڈ اِن پر تلاش کرنے کی بھی کوشش کی اور راہول نامی ایک شخص مِل بھی گیا جو لندن میں کام کرتا تھا، مگر اس کی پروفائل لاک ہونے کے باعث وہ کوئی پیغام نہیں بھیج سکتا تھا۔
تیمور نے اگلی ٹوئٹ میں کہا کہ لنکڈن کے مطابق راہول برطانیہ کی ایک فوڈ اینڈ بیوریج کمپنی میں ملازمت کرتا ہے، اب میں اس کے ہیڈ آفس فون کرنے جا رہا ہوں۔
لیکن حیران کن طور پر غازی یہاں بھی کامیاب نا ہو سکے، انہوں نے لکھا کہ عجیب کمپنی ہے جنہوں نے اپنی ویب سائٹ پر پتہ ہی نہیں دیا اور نا ہی کسٹمر سروس ہیلپ لائن مہیا کی ہے۔ بعدازاں تیمور نے کمپنیز ہاؤس ویب سائٹ پر جانے کا فیصلہ کیا۔
غازی نے فلمی انداز میں لکھا کہ مجھے راہول کے آفس کا پتہ چل گیا ہے اور اب میں اس کے ہیڈ آفس ’انجلی‘ کے انداز میں جا رہا ہوں، دعا ہے کہ اس نے اپنے بینک کارڈز منسوخ نا کروائے ہوں۔
غازی تیمور نے راہول کو بالآخر تلاش کرلیا جو کہ مذکورہ کمپنی کے فنانس مینیجر تھے۔
غازی کی ٹوئٹ کے مطابق راہول والٹ کو دیکھ کر صدمے کی سی کیفیت میں آگئے تھے جب کہ ان کی آنکھوں میں آنسو بھی تھے۔
سوشل میڈیا صارف کی اس کاوش کو ناصرف پاکستان میں سراہا جا رہا ہے بلکہ پڑوسی ملک بھارت میں بھی ان کے چرچے ہو رہے ہیں، صارفین بڑی تعداد میں غازی کے لیے والہانہ محبت کا اظہار کر رہے ہیں۔
اپنی آخر ٹوئٹ میں غازی تیمور نے تمام سوشل میڈیا صارفین کا شکریہ ادا کرتے ہوئے لکھا کہ اس وقت یہ لکھتے ہوئے میری آنکھوں میں آنسو ہیں، گذشتہ ایک دن میں بہت سے اجنبی لوگوں نے محبت دکھائی جس کا میں شکرگزار ہوں۔
انہوں نے مزید لکھا کہ گذشتہ سال ہم سب کے لیے انتہائی مشکل رہا، اس قسم کے چھوٹے چھوٹے کاموں سے دنیا کو رہنے کے لیے بہتر جگہ بنایا جا سکتا ہے۔
