سابق افغان ڈپٹی اسپیکر نے طالبان جنگجو کے خاتون پر تشدد کی ویڈیو شیئر کردی

افغانستان کی ایک مصروف شاہراہ پر طالبان جنگجو کی جانب سے سڑک پر چلتی لڑکی کو چھڑی سے مارنے کی ویڈیو سامنے آئی ہے۔

افغانستان کی پارلیمنٹ کی سابق ڈپٹی اسپیکر فوزیہ کوفی نے اپنے آفیشل اکاؤنٹ پر ایک ویڈیو پوسٹ کی ہے۔ 

ویڈیو میں دیکھا جاسکتا ہے کہ مصروف شاہراہ پر ماسک پہنی ایک لڑکی کو مسلح طالبان جنگجو چھڑی سے مارتا ہے لیکن لڑکی بغیر کوئی ردعمل دیے روڈ کراس کرتی ہے۔

ویڈیو کے حوالے سے مصدقہ طور پر نہیں کہا جاسکتا ہے کہ یہ کب اور کہاں کی ویڈیو ہے تاہم ویڈیو پر سوشل میڈیا صارفین نے شدید ردعمل کا اظہار کیا ہے۔

خیال رہے کہ گزشتہ دنوں طالبان کے دوحہ سیاسی دفتر کے ترجمان سہیل شاہین نے برطانوی چینل اسکائی نیوزکو دیے گئے انٹرویو میں کہا تھا کہ طالبان کی جانب سے خواتین کو مکمل برقعہ پہننے کیلئے نہیں کہا جائے گا لیکن حجاب پہننا ضروری ہوگا۔