مہنگے داموں چینی خریدنے والوں کو رقم کیسے واپس کی جائے؟ ہائیکورٹ نے معاونت طلب کرلی
17 ستمبر ، 2021
لاہور ہائیکورٹ نے مہنگے داموں چینی خریدنے والوں کو رقم واپسی کیلئے وکلا سے معاونت طلب کرلی۔
لاہور ہائیکورٹ کے سنگل بینچ نے مختلف شوگر ملز کی درخواستوں پر 4 صفحات پر مشتمل عبوری حکم جاری کیا ہے۔
فیصلے میں تحریر کیا گیا ہے کہ شوگر ملز کی زر ضمانت قومی خزانے کا حصہ نہیں بن سکتی کیونکہ یہ ٹیکس یا فیس نہیں، مہنگے داموں چینی خریدنے والے صارفین کو رقم بھی واپس نہیں کی جا سکتی۔
فیصلے کے متن کے مطابق وکلا شوگر ملز کی زر ضمانت رقم کے مصرف پر قانونی معاونت کریں۔
فیصلے میں کہا گیا ہے کہ پنجاب حکومت کے وکیل نے اشیائے خورد و نوش کی قیمتیں کنٹرول کرنے سے متعلق رولز بنانے کیلئے مہلت کی استدعا کی جس پر عدالت نے سماعت 23 ستمبر تک ملتوی کر دی۔
خیال رہے کہ شوگر ملوں نے چینی کی قیمت 89روپے مقرر کرنے کے خلاف لاہور ہائیکورٹ سے رجوع کیا تھا جبکہ ہائیکورٹ نے شوگر ملوں کو سرکاری ریٹ سے مہنگی چینی فروخت کرنے پر زر ضمانت جمع کرانے کی ہدایت کی تھی۔
