24 ستمبر ، 2021
لاہور کی مقامی عدالت نے شریف خاندان کی جاتی عمرہ اراضی کے وراثتی انتقال کی منسوخی کے خلاف درخواست پر چیف سیٹلمنٹ کمشنر اور نواز شریف کی بہن کوثر یوسف کو یکم اکتوبر کے لیے نوٹسز جاری کر دیے ہیں۔
سول جج عمران اسحاق نے یوسف عباس شریف کے دعوے پر تحریری حکم جاری کیا۔
عدالت نے تحریری حکم میں لکھا ہے کہ عدالت کا تعمیل کنندہ نوٹس وصول کرانے کی تصاویر بھی بنائے۔ عدالتی نوٹس کی تعمیل کے بعد نوٹسز کے پیچھے نقشہ موقع بھی بنایا جائے۔
عدالت نے چیف سیٹلمنٹ کمشنر اور کوثر یوسف کو ڈاک کے ذریعے نوٹس بھجوانے کی ہدایت بھی کی۔
یوسف عباس نے درخواست میں مؤقف اپنایا ہے کہ دادی کے انتقال کے بعد وراثت کا انتقال کرانے کیلئے محکمہ مال کے پٹواری کو درخواست دی لیکن پٹواری نے موجودہ حکومت کے دباؤ پر اراضی کا وراثتی انتقال درج کرنے سے انکار کر دیا۔
درخواست گزار کا مؤقف ہے کہ موجودہ حکومت کے دباؤ پر غیرقانونی طریقے سے اراضی کی ملکیت و حیثیت تبدیل کی جارہی ہے، استدعا ہے کہ متعلقہ حکام کو دادی کی ملکیتی اراضی کی ملکیت اور حیثیت تبدیل کرنے سے روکا جائے۔