Can't connect right now! retry

کھیل
27 ستمبر ، 2021

نیشنل ٹی ٹوئنٹی کپ:سینٹرل پنجاب نے دفاعی چیمپئن خیبر پختونخوا کو شکست دے دی

نیشنل ٹی ٹوئنٹی کپ میں سینٹرل پنجاب نے دفاعی چیمپئن خیبر پختونخوا کو 43 رنز سے شکست دے دی۔ —فوٹو:پی سی بی ٹوئٹر
نیشنل ٹی ٹوئنٹی کپ میں سینٹرل پنجاب نے دفاعی چیمپئن خیبر پختونخوا کو 43 رنز سے شکست دے دی۔ —فوٹو:پی سی بی ٹوئٹر

نیشنل ٹی ٹوئنٹی کپ میں سینٹرل پنجاب نے دفاعی چیمپئن خیبر پختونخوا کو 43 رنز سے شکست دے دی۔

راولپنڈی میں جاری نیشنل ٹی ٹوئنٹی کے پہلے مرحلے میں ہوم سٹی سینٹرل پنجاب نے خیبر پختون خوا کو 43 رنز سے ہرا کر ٹورنامنٹ میں دوسری کامیابی حاصل کرلی ہے۔ 

سینٹرل پنجاب نے ٹاس جیت کر پہلے بیٹنگ کرتے ہوئے مقررہ 20 اوورز میں چھ وکٹوں کے نقصان پر 171 رنز بنائے۔

 سینٹرل پنجاب کےکپتان بابر اعظم شاہین شاہ آفریدی کو ایک اوور میں 2 چوکے لگانے کے باوجود جلد پویلین واپس لوٹ گئے، انہوں نے 16 رنز بنائے۔

تاہم پہلے احمد شہزاد اور پھر حسین طلعت نے لمبی اننگز کھیل کر ان کی کمی محسوس نہ ہونے دی، احمد شہزاد نے چار چوکوں اور ایک چھکے کی بدولت 40 رنز کی اننگز کھیلی، انہوں نے بابر اعظم اور محمد اخلاق کے ہمراہ بالترتیب 42 اور 40 رنز کی شراکت قائم کی ، محمد اخلاق نے 24 رنز بنائے۔

حسین طلعت نے 26 گیندوں پر پانچ چوکوں اور تین چھکوں کی مدد سے 51 رنز کی دھواں دھار اننگز کھیلی، انہوں نے شعیب ملک کے ہمراہ 75 رنز کی شراکت قائم کی، شعیب ملک 24 رنز بنا کر آؤٹ ہوئے۔

شاہین شاہ آفریدی نے 2 جبکہ اسرار اللہ، آصف آفریدی، محمد وسیم اور ارشد اقبال نے ایک ایک وکٹ حاصل کی۔

172 رنز کے تعاقب میں دفاعی چیمپئن کی پوری ٹیم 128 رنز پر ہمت ہار گئی۔

مطلوبہ ہدف کے تعاقب میں خیبر پختونخوا کی ٹیم اننگز کے آغاز ہی سے مشکلات کا شکار رہی،کے پی کی ابتدائی چار وکٹیں محض 19 رنز پر گر گئیں. کپتان محمد رضوان 6، اسرار اللہ 7 جبکہ عادل امین اور مصدق احمد کھاتہ کھولے بغیر ہی پویلین واپس لوٹ گئے۔

ایسے میں صاحبزادہ فرحان نے پہلے افتخار احمد اور پھر محمد وسیم کے ہمراہ پانچویں اور چھٹی وکٹ کے لیے بالترتیب 49 اور 45 رنز کی شراکت قائم کرکے خیبر پختون خوا کو امید ضرور دلائی تاہم وہ اپنی ٹیم کو فتح سے ہمکنار نہ کرسکے۔

صاحبزادہ فرحان اور محمد وسیم جونیئر نے 34، 34 رنز کی اننگز کھیلی. افتخار احمد نے 22 رنز بنائے۔

سینٹرل پنجاب کے وہاب ریاض نے 21 رنز کے عوض3 جبکہ حسن علی، احسان عادل، قاسم اکرم اور فہیم اشرف نے ایک ایک وکٹ حاصل کی۔

خیبر پختون خوا کی ایونٹ میں یہ پہلی شکست تھی یہ پہلا موقع ہے کہ جب کے پی کی ٹیم نیشنل ٹی ٹوئنٹی میں آل آؤٹ ہوئی۔

26 گیندوں پر 51 رنز کی جارحانہ اننگز کھیلنے اور ایک وکٹ حاصل کرنے پر حسین طلعت کو پلیئر آف دی میچ کا ایوارڈ دیا گیا۔

مزید خبریں :

Notification Management


پاکستان
دنیا
کاروبار
کھیل
انٹرٹینمنٹ
صحت و سائنس
دلچسپ و عجیب

ڈیسک ٹاپ نوٹیفکیشن کے لیے سبسکرائب کریں
Powered by IMM