ٹی ٹوئنٹی ورلڈ کپ کیلئے اسکاٹ لینڈ کی کِٹ کس نے ڈیزائن کی؟ جان کر حیران رہ جائیں گے

کسی بھی کھیل میں ملک کی نمائندگی کرنے والی ٹیم کی کِٹ ( جرسی) بہت اہمیت رکھتی ہے اور اس کو ڈیزائن کرنے کی ذمہ داری بھی تجربہ کار ٹیم کو دی جاتی ہے ۔

متحدہ عرب امارات اور عمان میں جاری آئی سی سی ٹی ٹوئنٹی ورلڈ کپ میں شامل اسکاٹ لینڈ کرکٹ ٹیم کی کِٹ کسی مشہور اور تجربہ کار ڈیزائنر نے نہیں بلکہ ایک 12 سالہ بچی نے ڈیزائن کی ہے۔

جی ہاں ٹی ٹوئنٹی ورلڈ کپ میں اسکاٹ لینڈ کی کِٹ 12 سالہ ریبیکا ڈاؤنی نے ڈیزائن کی ہے۔

اسکاٹ لینڈ کرکٹ بورڈ نے ٹوئٹ کرتے ہوئے ٹی ٹوئنٹی ورلڈ کپ کیلئے اپنی ٹیم کی کِٹ ڈیزائن کرنے والی  12 سالہ ریبیکا کے بارے میں بتایا اور اس کا شکریہ بھی ادا کیا۔

اس کے علاوہ آئی سی سی نے بھی ٹوئٹ کرتے ہوئے ریبیکا کی تعریف کی۔

واضح رہے کہ آج کھیلے گئے آئی سی سی ٹی 20 ورلڈ کپ کے پہلے مرحلے کے پانچویں میچ میں اسکاٹ لینڈ نے پاپوانیوگنی کو 17 رنز سے شکست دے دی۔

ٹی ٹوئنٹی ورلڈکپ: اسکاٹ لینڈ نے پاپوا نیوگنی کو 17 رنز سے شکست دے دی

166 رنز کے تعاقب میں پاپوانیوگنی کی پوری ٹیم آخری اوور میں 148 رنز بنا کر آؤٹ ہوگئی۔

اس سے قبل اسکاٹ لینڈ نے بنگلادیش کو رواں ٹی 20 ورلڈ کپ کے پہلے میچ میں اپ سیٹ کرتے ہوئے 6 رنز سے شکست دی تھی۔