24 نومبر ، 2021
ارجنٹینا سے تعلق رکھنے والے ڈاکٹر اور صحافی نیلسن کاسترو نے سابق مشہور فٹبالر میراڈونا سے متعلق حیران کن انکشاف کیا ہے کہ عظیم فٹبالر کو بغیر دل کے دفنایا گیا۔
غیر ملکی میڈیا کے مطابق نیلسن کاسترو نے ’میراڈونا کی صحت، ایک سچی کہانی‘ (“Maradona’s Health: A True Story)کے عنوان سے ایک کتاب شائع کی ہے جس میں انہوں نے سابق فٹبالر کی صحت اور موت کے بارے میں چونکا دینے والے انکشافات کیے ہیں۔
ڈاکٹر کاسترو نے اپنی کتاب کا حوالہ دیتے ہوئے ایک انٹرویو میں کہا کہ میراڈونا کے کچھ انتہا پسند مداح تدفین کے بعد ان کا دل نکالنے کا ارادہ رکھتے تھے لیکن ایسا نہ ہوا۔
ان کا کہنا تھا کہ میراڈونا کی موت کی تحقیقات کیلئے ان کے دل کا ہونا بہت ضروری تھا اس لیے تدفین سے قبل ڈاکٹرز نے ان کا دل نکال لیا تھا۔
ڈاکٹر کاسترو کے مطابق انہوں نے یہ معلومات میرا ڈونا کے طبی ریکارڈ سے حاصل کی ہیں جبکہ انہوں نے ان لوگوں سے بھی بات کی جو اس کے گواہ ہیں۔
ڈاکٹر کاسترو نے مزید کہا کہ عام طور پر انسانی دل کا وزن 300 گرام ہوتا ہے لیکن میراڈونا کے دل کا وزن 500 گرام تھا۔
واضح رہے کہ میراڈونا 25 نومبر 2020 کو ارجنٹینا کے دارالحکومت بیونس آئرس میں 60 سال کی عمر میں انتقال کر گئے تھے جبکہ ارجنٹینا کی عدلیہ میراڈونا کی موت کی تحقیقات کر رہی ہے۔