عمران فاروق قتل کیس کے مجرموں کی سزا کیخلاف اپیلوں پر فیصلہ محفوظ

اسلام آباد ہائیکورٹ نے ڈاکٹر عمران فاروق قتل کیس میں انسداد دہشت گردی عدالت سے عمر قید کی سزا پانے والے تینوں مجرموں کی سزا کے خلاف اپیلوں پرفیصلہ محفوظ کرلیا۔

اسلام آباد ہائیکورٹ کے چیف جسٹس اطہر من اللہ اور جسٹس عامر فاروق پر مشتمل دو رکنی ڈویژن بینچ نے عمران فاروق قتل کیس کے سزا یافتہ مجرموں خالدشمیم، معظم علی اور محسن علی کی انسداد دہشت گردی کی عدالت سے عمر قید کی سزاؤں کے خلاف اپیلوں پر فریقین کے دلائل سننے کے بعد فیصلہ محفوظ کیا۔

وفاق کی جانب سے ڈپٹی اٹارنی جنرل خواجہ امتیاز نے دلائل مکمل کیے اور تحریری جواب گراف کے ساتھ پیش کرتے ہوئے مجرموں کی اپیلیں خارج کر کے سزا برقرار رکھنے کی استدعا کی۔

اپیل کنندگان کے وکلا نے سزا کالعدم قرار دے کر ان کے مؤکلین کو بری کرنے کی استدعا کی اور دلائل تحریری طور پر بھی جمع کرائے۔

خیال رہے کہ اسلام آباد کی انسداد دہشت گردی عدالت نے لندن میں قتل کیے گئے  ڈاکٹر عمران فاروق کے کیس میں خالد شمیم، معظم علی اور محسن علی کو عمر قید اور جرمانوں کی سزا سنائی تھی۔