نائیجیریا: موٹرسائیکل گینگ کی فائرنگ سے 200 افراد ہلاک
10 جنوری ، 2022
نائیجیریا میں کئی دنوں سے جاری موٹرسائیکل گینگ کی اندھا دھن فائرنگ کے مختلف واقعات میں کم از کم 200 افراد ہلاک ہوگئے۔
برطانوی نشریاتی ادارے بی بی سی کے مطابق نائیجیریاکے شمال مغربی ریاست زمفارا میں کئی دنوں سے موٹرسائیکل سوار گروہوں کی فائرنگ سے 200 افراد ہلاک ہوچکے ہیں۔
رپورٹس کے مطابق خیال کیا جارہا ہے کہ فائرنگ کے یہ واقعات گزشتہ ہفتے ہونے والے فوجی فضائی حملوں کے جواب میں کیے گئے ہیں جس نے کچھ جرائم پیشہ گروہوں کو اپنے ٹھکانوں سے نکلنے پر مجبور کر دیا گیا تھا۔
نشریاتی ادارے کے مطابق مقامی طور پر ڈاکو کے نام سے جانے جانے والے، یہ گروہ مجرموں کے جدید ترین نیٹ ورک ہیں جو اس علاقے کے بڑے حصے میں کام کرتے ہیں اور اکثر جانور چوری جبکہ مقامی افراد کو تاوان کے لیے اغوا کرتے ہیں۔
تاہم گزشتہ ہفتے حکومت نے سرکاری طور پر ان ڈاکوؤں کو دہشت گرد قرار دیا، جس سے سیکورٹی فورسز کو گروہوں اور ان کے حامیوں پر سخت پابندیاں عائد کرنے کی اجازت دی۔
رپورٹس کے مطابق جمعے کو ابتدائی طور پر یہ اطلاع ملی تھی کہ 300 بندوق بردار مشتبہ عسکریت پسند اس علاقے میں داخل ہوئے اور 100 سے زیادہ افرادکو ہلاک کیا جبکہ مسلح افراد نے حملے میں گھروں کو جلایا اور لاشوں کو مسخ کردیا اور 2ہزار سے زائد گائے بھینسیں چوری کرلیں۔
دوسری جانب انسانی امور کی وزیر سعدیہ عمر فاروق نے بتایا کہ گزشتہ کئی دنوں کے درمیان 200 سے زائد افراد کو دفن کیا جاچکا ہے جبکہ ا نہوں نے اس بات کی بھی تصدیق کی کہ 10 ہزار سے زیادہ لوگ بے گھر ہو چکے ہیں اور بہت سے لوگ اب بھی لاپتہ ہیں۔
اس کے علاوہ نائیجیریا کے صدر محمدو بوہاری نے وعدہ کیا ہے کہ حکومت ان مسلح گرہوں کے خلاف قانون کے مطابق کارروائی کرے گی۔
