وزیراعظم کا ابوظبی کے ولی عہد سے رابطہ، حوثی باغیوں کے حملے کی مذمت

وزیراعظم عمران خان نے متحدہ عرب امارات کی مسلح افواج کے نائب سربراہ اور ریاست ابوظبی کے ولی عہد شیخ محمد بن زاید النہیان سے رابطہ کیا۔

وزیراعظم عمران خان اور شیخ محمد بن زید النہیان کے درمیان ٹیلیفونک رابطہ ہوا ہے۔ وزیر اعظم عمران خان نے حوثی باغیوں کے حملے کی مذمت کی اور امارات کے ساتھ  یکجہتی کا اظہار کیا۔

ابوظبی میں حوثی باغیوں کے مشتبہ ڈرون حملے، ایک پاکستانی سمیت 3 افراد ہلاک

ابتدائی تحقیقات کے مطابق ڈرونز کی وجہ سے دو مقامات پر آگ لگی، مصفح کے مقام پر تین فیول ٹینکرز پھٹنے سے 3 افراد ہلاک اور 6 زخمی ہوئے، ائیرپورٹ کنسٹرکشن ایریا میں کوئی نقصان سامنے نہیں آیا

خیال رہے کہ گزشتہ روز متحدہ عرب امارات کے دارالحکومت ابوظبی کے دو مقامات پر مشتبہ ڈرون حملوں کے باعث آگ لگنے سے ایک پاکستانی سمیت 3 افراد ہلاک اور متعدد زخمی ہوئے تھے۔

یمن کے حوثی باغیوں نے ابوظبی میں ڈرون حملوں کا دعویٰ کیا تھا۔ حوثی ملیشیا کے ترجمان کے مطابق امارات کے خلاف آپریشن شروع کردیا ہے اور جلد حملوں کے حوالے سے مزید معلومات فراہم کی جائیں گی۔