28 جنوری ، 2022
لائسنس کے بغیر ڈرائیونگ کرنا جرم ہونے کے ساتھ اپنی اور دوسروں کی زندگی کیلئے خطرے کا باعث بھی ہے۔
اکثر افراد بغیر لائسنس کے گاڑی چلاتے ہیں لیکن وہ جلد ہی ٹریفک پولیس کے ہاتھ لگ ہی جاتے ہیں لیکن آج ہم آپ کو ایسے شخص کے بارے میں بتانے جارہے ہیں جو گزشتہ 70 سال سےزائد عرصے سے بغیر لائسنس کے گاڑی چلا رہا ہے۔
برطانوی نشریاتی ادارے بی بی سی کے مطابق بدھ کے روز ناٹنگھم کے علاقے بل ویل میں پولیس نے 84 سالہ ڈرائیورکو گشت کے دوران روکا۔
پولیس افسر کے مطابق 1938 میں پیدا ہونے والے شخص نے انہیں بتایا کہ وہ 12 سال کی عمر سے بغیر لائسنس کے ڈرائیونگ کر رہا ہے جبکہ اسے پولیس نے بھی کبھی نہیں روکا۔
پولیس کے مطابق شکر ہے کہ اس شخص کا کبھی کوئی حادثہ نہیں ہوا اور نہ کسی کو چوٹ پہنچائی۔