سپریم کورٹ بار نے فائزعیسٰی نظرِ ثانی کیس کا تحریری فیصلہ تاریخی قرار دیدیا

سپریم کورٹ بار  ایسوسی ایشن کے صدر  احسن بھون نے جسٹس قاضی فائزعیسٰی نظرِ ثانی کیس میں سپریم کورٹ کا فیصلہ تاریخی اور اہم سنگِ میل قرار دے دیا۔

ایک بیان میں احسن بھون کا کہنا ہےکہ سپریم کورٹ کے فیصلے میں تمام آئينی و قانونی پہلوؤں کو سامنے لایا گیا جنہیں گزشتہ فیصلے میں نظر انداز کردیا گيا تھا۔

جسٹس قاضی اور اہلخانہ کا ٹیکس ریکارڈ غیر قانونی طریقے سے اکٹھا کیا گیا: تحریری فیصلہ

سپریم کورٹ نے مختصر فیصلہ 26 اپریل 2021 کو سنایا تھا، 9 ماہ 2 دن بعد نظر ثانی درخواستوں کا تحریری فیصلہ آج جاری ہوا جس میں جسٹس یحییٰ آفریدی نے اضافی نوٹ تحریر کیا ہے

 احسن بھون کا کہنا ہےکہ حکومت کو جسٹس یحییٰ آفریدی کا نوٹ باریک بینی سے دیکھنا چاہیے اور اس میں جن کو ذمہ دار ٹھہرایا گیا ہے ان کا کسی الیکٹڈ آفس میں رہ جانا اب ممکن نہیں، یہ فیصلہ بالکل آزادانہ ہے۔

 خیال رہےکہ سپریم کورٹ نےگزشتہ روز جاری کردہ تحریری فیصلے میں قرار دیا تھا کہ سپریم کورٹ کا جسٹس فائز عیسیٰ کی فیملی کے خلاف ایف بی آر کو تحقیقات کا حکم دینا غلط تھا، سرینا عیسیٰ کے ٹیکس کا کیس سپریم جوڈیشل کونسل کو نہیں بھیجا جاسکتا، جسٹس قاضی فائز عیسٰی اور ان کے اہل خانہ کا ٹیکس ریکارڈ غیر قانونی طریقے سے اکھٹا کیا گیا۔