ملک کے خلاف سازش کے الزام کو عوام کے سامنے رکھ کر فیصلہ کرنا پڑے گا: شاہد خاقان

مسلم لیگ ن کے رہنما شاہد خاقان عباسی نے کہا ہے کہ تحریک عدم اعتماد کے لیے ہمارے نمبرز  پورے ہیں اور  تمام اراکین اسلام آباد میں ہی ہیں۔

جیو نیوز کے پروگرام آج شاہ زیب خانزادہ میں  میزبان شاہ زیب خانزادہ سے گفتگو کرتے ہوئے سابق وزیر اعظم کا کہنا تھا کہ اسمبلی کی اکثریت عدم اعتماد اور شہبازشریف کی وزارت عظمیٰ کے حق میں بھی ووٹ دے گی۔ 

مرکزی رہنما مسلم لیگ ن کا کہنا تھا کہ ملک کے خلاف سازش کے الزام کو بھی عوام کے سامنے رکھ کر فیصلہ کرنا پڑے گا اور  یہ بھی فیصلہ کرنا ہوگا کہ صدر مملکت، وزیراعظم اور  وزراء آئین کے خلاف سازش میں ملوث تھے یا نہیں؟۔

سپریم کورٹ: ڈپٹی اسپیکر کی رولنگ اور اسمبلی توڑنا غیر آئینی قرار، قومی اسمبلی بحال کردی گئی

ازخود نوٹس کیس کا فیصلہ 0-5 سے متفقہ طور پر سنایا گیا، 3 اپریل کی ڈپٹی اسپیکر کی رولنگ اور صدر کی جانب سے اسمبلی تحلیل کرنا آئین سے متصادم تھا، قومی اسمبلی بحال کی جاتی ہے، سپریم کورٹ

خیال رہے کہ گزشتہ رات سپریم کورٹ کے پانچ رکنی بینچ نے متفقہ فیصلہ دیا تھا کہ تحریک عدم اعتماد کو مسترد کرنے کی ڈپٹی اسپیکر قاسم سوری کی 3 اپریل کی رولنگ اور وزیراعظم کی ایڈوائس پر صدر کی جانب سے قومی اسمبلی کو تحلیل کرنا آئین سے متصادم تھا جس کے بعد سپریم کورٹ نے قومی اسمبلی بحال کر دی گئی ہے۔

سپریم کورٹ نے فیصلے میں کہا کہ اسپیکر فوری طور پر قومی اسمبلی کا اجلاس بلائیں، قومی اسمبلی اجلاس ہرصورت 9 اپریل صبح 10:30 بجے سے پہلے بلایا جائے۔