20 مئی ، 2022
ملتان کی بہاء الدین زکریا یونیورسٹی میں طالبات کو ہراساں کرنے کے الزام میں ایک طالبعلم اور کلرک کو گرفتار کرلیا گیا۔
وفاقی تحقیقاتی ایجنسی (ایف آئی اے) کے سائبر کرائم کے مطابق یونیورسٹی کلرک منور اور طالبعلم ابوبکر طالبات کو فیس کم کرنے کا جھانسہ دے کر ان کی قابل اعتراض ویڈیوز بناتے اور پھر انہیں بلیک میل کرتے تھے۔
حکام کا کہنا ہے کہ طالبات کی جانب سے بلیک میل کیے جانے کی شکایات موصول ہوئیں تھیں جس پر کارروائی کرتے ہوئے دو ملزمان کو گرفتار کیا گیا۔
ایف آئی اے حکام کے مطابق دونوں ملزمان کے موبائل فونز سے نازیبا ویڈیوزبھی برآمد ہوئی ہیں۔
انچارج سائبر کرائم ونگ شعیب ہارون کا کہنا تھاکہ ملزمان کے خلاف قانونی کاروائی شروع کردی ہے اور تحقیقات کے دوران گروہ کا انکشاف ہوا جسے جلد گرفتارکرلیں گے۔