دعا کریں عمران خان کی گرفتاری کی اجازت مل جائے: وزیر داخلہ
22 مئی ، 2022
وفاقی وزیر داخلہ رانا ثناء اللہ کا کہنا ہے کہ دعا کریں عمران خان کی گرفتاری کی اجازت مل جائے۔
لاہور میں صحافیوں سے گفتگو کرتے ہوئے رانا ثناء اللہ کا کہنا تھا ان کی خواہش ہے کہ عمران خان کو اسی سیل میں رکھا جائے جہاں انہیں رکھا گیا تھا لیکن ایسے فیصلے اتحادی جماعتوں کے سربراہوں کے بغیر نہیں کیے جا سکتے۔
ان کا کہنا تھا کہ عمران خان کو 3 روز جیل میں رکھا جائے تو اس کی سیاست نکل جائے گی۔
پنجاب اسمبلی کے اجلاس سے متعلق بات کرتے ہوئے رانا ثناء اللہ کا کہنا تھا پرویز الٰٗہی پہلے اپنے خلاف عدم اعتماد کی تحریک پر ووٹنگ پھر اجلاس بلائیں۔
پاکستان تحریک انصاف کی رہنما کی گرفتاری سے متعلق سوال پر وزیر داخلہ کا کہنا تھا شیریں مزاری کی گرفتاری میں حکومت کا یا کسی اور کا عمل دخل نہیں ہے۔
رانا ثناء اللہ نے کہا کہ بھنور سے نکالنے کے لیے ہمیں اور اداروں کو مزید زور لگانے کی ضرورت ہے، اتحادی جماعتیں ملک کو مشکل سے نا نکال سکیں تو کوئی حادثہ ہو جائے گا۔
