نام ای سی ایل میں ڈالنے پر شہزاد اکبرکا ردعمل سامنے آگیا

پاکستان تحریک انصاف ( پی ٹی آئی) دور میں ایسٹ ریکوری یونٹ کے سربراہ اور سابق وزیراعظم عمران خان کے مشیر احتساب شہزاد اکبرکا ایگزٹ کنٹرول لسٹ (ای سی ایل) میں نام ڈالنے پر ردعمل سامنے آگیا۔

ایک بیان میں شہزاد اکبرکا کہنا تھا کہ  این سی اے (نیشنل کرائم ایجنسی برطانیہ) سیٹلمنٹ نیب انکوائری پر نیب کو دو بار مراسلہ لکھا، نیب کو کہا کہ میرا بیان ویڈیو لنک پریا لندن ہائی کمیشن میں لے لیا جائے۔

پی ٹی آئی دور میں ایسٹ ریکوری یونٹ کے سربراہ شہزاد اکبرکا نام ای سی ایل پرڈال دیا گیا

شہزاد اکبر اور بیرسٹر ضیاء المصطفیٰ نسیم کے خلاف ایک پراپرٹی ٹائیکون کوبرطانیہ سے آنے والی رقم فراہم کرنےکاالزام ہے: ذرائع وزارت داخلہ

شہزاد اکبرکا کہنا تھا کہ لگتا ہے نیب آزادانہ انکوائری میں دلچسپی نہیں رکھتا اس لیے اپنے خطوط پبلک کیے، تمام خطوط اور واٹس ایپ میسیجز موصول کیےگئے ہیں، نیب نے گھوڑے کے آگےگاڑی ڈال دی، ابھی تک کوئی کیس نہیں مگر  نام ای سی ایل میں ڈال دیا گیا۔

ان کا کہنا تھا کہ یاد دلاؤں یہ این سی اے سے تصفیہ ہے تو کیا این سی اے عہدیداروں کے نام بھی ای سی ایل میں ڈالیں گے؟ نیب کے آئی بی میں تبدیل ہونے میں کوئی شک باقی نہیں رہےگا، منی لانڈررز انتقامی کارروائیوں میں مصروف ہیں۔

ذرائع کے مطابق شہزاد اکبرکا نام نیب کی درخواست پر ای سی ایل پر ڈالا گیا ہے۔

خیال رہے کہ شہزاد اکبر آج کل برطانیہ میں ہیں اور وہ سابق وزیراعظم عمران خان کے سابق مشیر برائے داخلہ و احتساب بھی رہے۔