16 اگست ، 2022
سابق بھارتی کپتان کپل دیو نے خبر دار کیا ہے کہ فٹ بال کی طرح کرکٹ میں بھی چار سال میں ایک بار ممالک ورلڈ کپ میں ایک دوسرے کا مقابلہ کریں گے اور اس دوران کھلاڑی لیگز کھیلیں گے۔
سابق بھارتی کپتان کپل دیو نے ٹیسٹ اور ون ڈے کو محفوظ بنانے کا مطالبہ کرتے ہوئے ایک انٹرویو میں کہا کہ ٹی ٹوئنٹی لیگز بڑھ رہی ہیں ،انٹرنیشنل کرکٹ کونسل کو اقدامات کرنا ہوں گے کہ وہ ٹیسٹ اور ون ڈے فارمیٹ کو بچانے کے لیے آگے آئے کیونکہ یہ آئی سی سی کی بڑی ذمہ داری ہے کہ وہ کھیل کو اچھے انداز سے چلائے۔
کپل دیو نے کہا کہ کرکٹ اب فٹ بال کی سمت میں چل پڑی ہے، جس طرح فٹ بال میں ممالک ایک دوسرے کے خلاف نہیں کھیلتے اور چار سال بعد ایک ورلڈ کپ میں ممالک کا آمنا سامنا ہوتا ہے اسی طرح مجھے لگتا ہے کہ کرکٹ میں بھی ورلڈ کپ ہوگا اور باقی وقت میں کرکٹرز لیگز کھیلیں گے ۔
انہوں نے کہا کہ اب آئی سی سی کو دیکھنا ہے کہ ٹیسٹ اور ون ڈے کو کیسے بچانا ہے؟