بچوں کے ڈیٹا کے ناقص انتظام پر انسٹاگرام کو ریکارڈ جرمانے کی سزا سنادی گئی

آئرلینڈ میں انسٹاگرام کے کم عمر صارفین کے ڈیٹا کے ناقص انتظام پر میٹا کو ریکارڈ 40 کروڑ 50 لاکھ یورو جرمانے کی سزا سنائی گئی ہے۔

آئرلینڈ کے ڈیٹا پروٹیکشن کمیشن کی جانب سے بتایا گیا کہ 2 سالہ تحقیقات میں ثابت ہوا کہ انسٹاگرام نے یورپ کے ڈیٹا قوانین کی خلاف ورزی کی۔

انسٹاگرام کی جانب سے آئرلینڈ میں 13 سے 17 سال کی عمر کے صارفین کو بزنس اکاؤنٹس بنانے کی اجازت دی گئی تھی۔

ان اکاؤنٹس میں صارفین کے فون نمبر اور ای میل ایڈریس بھی دیکھے جاسکتے تھے۔

کمیشن نےیورپی یونین کی جانب سے میٹا کے خلاف تحقیقات کی تھی کیونکہ میٹا کا یورپ میں ہیڈ آفس آئرلینڈ میں موجود ہے۔

اس سے قبل ستمبر 2021 میں میٹا کو ڈیٹا قوانین کی خلاف ورزی پر 22 کروڑ 50 لاکھ یورو جرمانے کی سزا سنائی گئی تھی۔

دوسری جانب میٹا کے ایک ترجمان نے کہا کہ یہ تحقیقات ایپ کی پرانی سیٹنگز کے حوالے سے تھی جس کو ایک سال پہلے اپ ڈیٹ کردیا گیا تھا، جس کے بعد سے نوجوانوں اور ان کے ڈیٹا کے تحفظ کے لیے متعدد نئے فیچرز متعارف کرائے گئے۔