20 ستمبر ، 2022
جیمز ویب ٹیلی اسکوپ کا بنیادی مقصد دور دراز موجود کہکشاؤں کو تلاش کرنا ہے مگر حال ہی میں اس نے زمین کے پڑوسی سیارے مریخ کا مشاہدہ کیا۔
جیمز ویب ٹیلی اسکوپ کی جانب سے کھینچی گئی مریخ کی اولین تصاویر جاری کی گئی ہیں۔
یہ تصاویر 5 ستمبر کو کھینچی گئی تھیں اور اس میں زمین کے پڑوسی سیارے کو نئے انداز سے دکھایا گیا ہے۔
جیمز ویب ٹیلی اسکوپ کی انفراریڈ ٹیکنالوجی نے مریخ کی سطح اور آب و ہوا کی تفصیلات کو کیمرے کی آنکھ میں محفوظ کیا۔
خیال رہے کہ جیمز ویب ٹیلی اسکوپ زمین سے 16 لاکھ کلومیٹر کے فاصلے پر واقع ہے اور اس نے مریخ کی سورج سے روشن سمت کو کیمرے کی آنکھ میں محفوظ کیا۔
ان تصاویر میں مریخ کے مشرقی حصے کو دکھایا گیا ہے اور ایک تصویر میں دکھایا گیا ہے کہ سورج کی روشنی سے مریخ کا حصہ کیسے جگمگاتا ہے۔
ناسا کی تحقیقی ٹیم کی جانب سے مستقبل قریب میں مریخ کے بارے میں ان تفصیلات کو بھی جاری کیا جائے گا جو جیمز ویب ٹیلی اسکوپ کے ذریعے حاصل کی جائیں گی۔
اسی طرح تحقیقی ٹیم اس ٹیلی اسکوپ کی مدد سے مریخ کے مختلف حصوں میں موجود فرق کو بھی شناخت کرے گی۔