سیلاب کی وجہ سے معاشی غیر یقینی بڑھی ہے: ڈاکٹر عنایت حسین

ڈپٹی گورنر اسٹیٹ بینک ڈاکٹر عنایت حسین نے کہا ہے کہ سیلاب کی وجہ سے معاشی غیر یقینی بڑھی ہے اورعام تاثر ہے کہ کرنٹ اکاؤنٹ خسارہ میں بھی اضافہ ہوگا۔

جیو نیوز کے پروگرام ’’آج شاہزیب خانزادہ کے ساتھ‘‘ میں گفتگو کرتے ہوئے ڈپٹی گورنر اسٹیٹ بینک نے کہا کہ ایک سوال یہ بھی ہے کہ کرنٹ اکاؤنٹ خسارہ توقع سے زیادہ بڑھا تو فنانسنگ کا کیا انتظام ہوگا؟

انہوں نے کہا کہ میرا خیال ہے کہ جوں ہی معاشی غیریقینی کو سنبھال لیا گیا تو صورتحال بہتر ہوجائے گی۔

ڈاکٹر عنایت حسین کا کہنا تھا کہ ورلڈ بینک، ایشین ڈویلمپنٹ بینک اور ایشین انفراسٹرکچر اینڈ انویسمنٹ بینک سے اضافی فنانسنگ کے انتظام کی خبر آگئی ہے، اس کا مارکیٹ پر مثبت اثر آئے گا۔