نگران وزیراعظم کے بیان پر پی ٹی آئی کا رد عمل سامنے آگیا

نگران وزیراعظم کے بیان پر ردعمل میں دیتے ہوئے پاکستان تحریک انصاف نے چیئرمین پی ٹی آئی کے بغیر انتخابات کو غیر اخلاقی و غیر آئینی قرار دے دیا۔

ترجمان پی ٹی آئی نے اپنے بیان میں کہا کہ نگران وزیراعظم کا بیان ریاستی ڈھانچے میں پائی جانے والی عدم حساسیت کا مظہر ہے، تحریک انصاف پاکستان کی سب سے بڑی واحد نمائندہ سیاسی جماعت ہے۔

انہوں نے کہا کہ چیئرمین پی ٹی آئی یا تحریک انصاف کے بغیر کرایا گیا الیکشن غیرآئینی، غیراخلاقی ہوگا، ایسے انتخابات کو عوام ہرگز قبول نہیں کریں گے۔

ترجمان پی ٹی آئی کا کہنا تھا کہ انوارالحق کاکڑ اپنے بیان کی فوری وضاحت کریں، بطور نگران وزیراعظم اپنی حکومت کوشرانگیز منصوبوں سےالگ کریں۔

الیکشن عمران یا جیل کاٹنے والے پارٹی ارکان کے بغیر بھی ہوسکتے ہیں: وزیر اعظم

پی ٹی آئی میں شامل ہزاروں افراد جو غیر قانونی سرگرمیوں میں ملوث نہیں ہیں وہ الیکشن میں حصہ لے سکیں گے، نگران وزیراعظم انوار الحق کاکڑ

یاد رہے کہ نگران وزیراعظم انوار الحق کاکڑ نے کہا تھا کہ شفاف الیکشن چیئرمین پاکستان تحریک انصاف (پی ٹی آئی) عمران خان یا جیل کاٹنے والے پارٹی کے سینکڑوں ارکان کے بغیر بھی ہوسکتے ہیں۔

امریکی خبر رساں ایجنسی کو انٹرویو دیتے ہوئے نگران وزیراعظم کا کہنا تھا کہ جیل کاٹنے والے پی ٹی آئی ارکان توڑ پھوڑ اور جلاؤ گھیراؤ کی غیر قانونی سرگرمیوں میں ملوث تھے، پی ٹی آئی میں شامل ہزاروں افراد جو غیر قانونی سرگرمیوں میں ملوث نہیں ہیں وہ الیکشن میں حصہ لے سکیں گے۔

انوار الحق کاکڑ کا کہنا تھا کہ میں عمران خان سمیت کسی سیاست دان سے ذاتی انتقام پر عمل پیرا نہیں، اگر کوئی قانون شکنی پر گرفت میں آیا ہے تو قانون کی بالادستی یقینی بنائیں گے، انتخابات فوج یا نگران حکومت نے نہیں الیکشن کمیشن نے کرانے ہیں۔