10 مارچ ، 2025 
چیمپئنز ٹرافی کی فتح کے بعد روہت شرما کامیاب کپتانوں کےکلب میں شامل
10 مارچ ، 2025
آئی سی سی چیمپئنز ٹرافی 2025 میں جہاں بھارت نیوزی لینڈ کو شکست دے کر تیسری مرتبہ چیمپئنز ٹرافی کا فاتح بنا ہے وہیں بھارتی کپتان روہت شرما نے متعدد اعزاز حاصل کرلیے ہیں۔
روہت شرما بھارت کو چیمپئنز ٹرافی جتوا کر عمران خان، رکی پونٹنگ اور ایم ایس دھونی جیسے کپتانوں کی فہرست میں شامل ہوگئے ہیں جن کی قیادت میں ٹیم نے پانچ یا زائد ٹیموں والے ٹورنامنٹ میں فتح حاصل کی۔
چیمپئنز ٹرافی 2025 سمیت روہت شرما کی قیادت میں بھارت 4 بڑے ٹورنامنٹ جیت چکا ہے جن میں ایشیا کپ 2018، ایشیا کپ 2023 اور ٹی ٹوئنٹی ورلڈکپ 2024 شامل ہیں۔
سابق پاکستانی کپتان عمران خان کی قیادت میں پاکستان نے آسٹریلیشیا کپ 1986، نہروکپ 1989، آسٹریلیشیا کپ 1990 اور ورلڈکپ 1992 جیتا ہے۔
سابق آسٹریلوی کپتان رکی پونٹنگ کی قیادت میں آسٹریلیا نے ورلڈکپ 2003، چیمپئنز ٹرافی 2006، ورلڈکپ 2007 اور چیمپئنز ٹرافی 2009 جیتی ہے۔
سابق بھارتی کپتان ایم ایس دھونی کی قیادت میں بھارت نے ٹی ٹوئنٹی ورلڈکپ 2007، ورلڈکپ 2011، چیمپئنز ٹرافی 2013 اور ٹی ٹوئنٹی ایشیا کپ 2016 جیتا ہے۔
اس کے علاوہ روہت شرما چیمپئنز ٹرافی کے فائنل میں مین آف دی میچ کا ایوارڈ لےکر چوتھے ایسےکپتان بن گئے ہیں جس نے آئی سی سی ایونٹ کے فائنل میں یہ ایوارڈ حاصل کیا ہے۔
ان سے قبل سابق ویسٹ انڈین کپتان کلائیو لائیڈ 1975کے ورلڈکپ میں، رکی پونٹنگ 2003 کے ورلڈکپ میں اور دھونی 2011 کے ورلڈکپ فائنل میں مین آف دی میچ کا ایوارڈ حاصل کرچکے ہیں۔
