کراچی …کراچی کے ضلع شرقی میں واقعہ کورنگی نمبر پانچ میں سیکیورٹی قافلے کو نشانہ بنایا گیا ہے اوراس دھماکے کے نتیجے میں ایک شخص جاں بحق جبکہ دس فوجی اہلکار اورپانچ شہری زخمی ہوگئے ہیں،بتایا جاتا ہے کہ فوجی ٹرک پر بم سے حملہ کیا گیا۔جیو نیوز کے طلحہ ہاشمی اور جواد شعیب کی رپورٹ کے مطابق میڈیا کو رینجرز ہیڈ کوارٹر کی جانب جانے سے روک دیا گیا، کورنگی پانچ میں واقع سوک سینٹر کے قریب سیکیورٹی قافلے پر بم حملہ کیا گیا،یہ بھی معلو م ہوا ہے کہ علاقے میں الیکشن ڈیوٹی انجام دینے کے بعد سیکورٹی قافلہ رینجرز ہیڈ کوارٹر روانہ ہوا تھا کہ اسے نشانہ بنایا گیا،جس کے بعد رینجرز نے علاقے میں سرچ آپریشن شروع کردیا ہے۔ادھر بعض ذرائع کا کہنا ہے کہ دھماکے میں ہلاکتوں کا بھی خدشہ ہے۔زخمیوں کو سندھ گورنمنٹ اسپتال کورنگی، سول اسپتال اور جناح اسپتال منتقل کیا جارہا ہے،جبکہ امدادی ٹیمیں جائے دھماکہ پر امدادی سرگرمیوں میں مصروف ہے۔دریں اثناء پولیس ذرائع کا کہنا ہے کہ دھماکے کا نشانہ بننے والا فوجی ٹرک تباہ ہوگیا ہے۔دھماکے کی جگہ پر بم ڈسپوزل اسکواڈ طلب کرلیا گیا ہے،جہاں سرچ آپریشن کے دوران ایک اور بم ملا ہے۔اس موقع پر سیکیورٹی حکام نے وہاں جمع ہونے والے لوگوں کو وہاں سے ہٹنے کو کہا تاکہ کہیں دوبارہ بم دھماکے سے مزید نقصان نہ ہو۔