کراچی…کراچی کے مختلف علاقوں میں رینجرز اور پولیس نے کارروائی کرتے ہوئے تین موٹر سائیکل چوروں سمیت متعدد ملزمان کو حراست میں لے لیا۔ شہر کے 12 مختلف مقامات پر رینجرز اور پولیس نے کارروایاں کرتے ہوئے ، 30 ملزمان کو حراست میں لے لیا۔ایس ایس پی اینٹی کار لفٹنگ سیل اسد رضا کے مطابق جوہر آباد میں اینٹی کارلفٹنگ سیل پولیس اور ملزمان کے درمیان مقابلہ کے بعد 3 ملزمان کو گرفتار کرلیا گیا، ملزمان کے قبضے سے 5 موٹر سائیکلیں بھی برآمد ہوئیں۔رینجرز کے مطابق کارروائیاں چنیسرگوٹھ، شاہ فیصل کالونی، گرین ٹاوٴن، رشید آباد، تیسر ٹاوٴن، داوٴد شورو گوٹھ، نارتھ ناظم آباد، کلفٹن، بلوچ کالونی میں کی گئیں، اس دوران 19 ملزمان کو حراست میں لے کر ان کے قبضے سے ہتھیار بھی برآمد کئے گئے۔پولیس کے مطابق لیاری کے علاقے بغدادی میں پولیس نے چھاپہ مار کارروائی کرتے ہوئے5 مشتبہ ملزمان کو گرفتار کرلیا،جن کے قبضے سے لوڈنگ منی ٹرک،شراب کی بوتلیں اور اسمگل شدہ سائیکل بھی ملی۔پولیس کارروائی کے دوران ایک ریوالور اور ایک 9 ایم ایم پستول بھی برآمد کرلئے گئے ، پکڑے گئے ملزمان سے مزید تفتیش کی جارہی ہے۔