28 فروری ، 2022
گزشتہ روز پاکستان سپر لیگ کے فائنل میں لاہور کے قذافی اسٹیڈیم میں جہاں عوام کا سمندر امڈ آیا وہیں آرمی چیف بھی میچ کا لطف اٹھانے اسٹیڈیم میں موجود تھے۔
قذافی اسٹیڈیم میں ملتان سلطانز اور لاہور قلندرز کے درمیان فائنل کو دیکھنے آرمی چیف جنرل قمر جاوید باجوہ اچانک اسٹیڈیم پہنچ گئے۔
خبر رساں ویب سائٹ سے منسلک صحافی نے اپنےٹوئٹر اکاؤنٹ پر آرمی چیف کی اسٹیڈیم میں موجودگی کی تصویر شیئر کی جس میں دیکھا جاسکتا ہےکہ جنرل قمر جاوید باجوہ کے ساتھ پاک فوج کے ایک اور اعلیٰ افسر بھی موجود تھے۔
خیال رہے کہ پی ایس ایل فائنل کے آغاز سے قبل قذافی اسٹیڈیم میں قومی ترانے نے شائقین کے لہو کو گرمایا ، اس دوران کھلاڑیوں کے ساتھ ہزاروں تماشائیوں نے کھڑے ہوکر ترانے میں حصہ لیا جس کے بعد آتش بازی کا مظاہرہ کرکے فائنل شروع کرنے کا اعلان کیا گیا تھا۔
اختتامی تقریب میں تماشائیوں سے بھرے اسٹیڈیم میں پہلے پاکستان سپر لیگ کے گزشتہ 6 ایڈیشنز کی مختصر تاریخ بتائی گئی تھی۔
پی ایس ایل 7 کے فائنل مقابلے میں لاہور قلندرز نے ملتان سلطانز کو 42 رنز سے شکست دے کر پہلی بار ٹائٹل اپنے نام کیا تھا۔
ٹیم | میچ | پوائنٹ |
---|---|---|
لاہور قلندرز | 10 | 14 |
ملتان سلطان | 10 | 12 |
اسلام آباد یونائیٹڈ | 10 | 12 |
پشاور زلمی | 10 | 10 |
کراچی کنگز | 10 | 6 |
کوئٹہ گلیڈی ایٹرز | 10 | 6 |