وزیراعظم عمران خان کے معاون خصوصی برائے سمندر پار پاکستانی زلفی بخاری نے تحریک انصاف کی رکن پنجاب اسمبلی عظمیٰ کاردار کی خاتون اول بشریٰ بی بی کے حوالے سے گفتگو کو شرم ناک قرار دے دیا۔
اپنی ٹوئٹ میں زلفی بخاری کا کہنا تھا کہ عظمیٰ کاردار کی خاتون اول سے متعلق گفتگو شرم ناک ہے، وزیراعظم اور خاتون اول کی عزت ہم سب کے لیے پہلی ترجیح ہے۔
انہوں نے کہا کہ اگر پارٹی سے وابستگی کا دعویٰ کرنے والی شخصیت ایسا کرے تو یہ پریشان کن ہے۔
خیال رہے کہ رکن پنجاب اسمبلی عظمیٰ کاردار کی خاتون اول کے حوالے سے گفتگو پر مبنی ٹیلی فونک گفتگو لیک ہونے پر گزشتہ روز انہیں حکومتِ پنجاب کے ترجمان کے عہدے سے ہٹا دیا گیا تھا۔